पेरिस । विश्वको सबैभन्दा नयाँ र ठूलो अन्तरिक्ष टेलिस्कोपले बृहस्पति ग्रहको पहिला कहिल्यै नदेखिएको रूप, ध्रुवीय ज्योति र साना चन्द्रमाहरू देखाएको छ ।
वैज्ञानिकहरूले सौर्यमण्डलको सबैभन्दा ठूलो ग्रहका तस्बिर सोमबार सार्वजनिक गर्दै यसबारे जानकारी दिएको फ्रान्सेली समाचार संस्था एएफपीले जनाएको छ ।
जेम्स वेब स्पेस टेलिस्कोपले गएको जुलाईमा उक्त तस्बिर खिचेको थियो । सो टेलिस्कोपले बृहस्पतिको उत्तरी र दक्षिणी प्रकाशहरू र घुमिरहेको ध्रुवीय तुवाँलोको अभूतपूर्व दृश्यहरू कैद गरेको थियो ।
ठूलो रातो दाग, पृथ्वी निल्न पुग्ने पर्याप्त आँधीबेहरी तथा अनगिन्ती साना आँधीहरूसँगै बृहस्पतिको चम्किलो रूप तस्बिरमा देखिन्छ ।
एउटा तस्बिर विशेषगरी ग्रह वरिपरि हल्का गोलाकारले घेर्नुका साथै दुई साना चन्द्रमा आकाशगंगाहरूको चम्किलो पृष्ठभूमिमा देखिन्छ ।
“हामीले बृहस्पतिलाई यसरी कहिल्यै देखेका छैनौँ । यो सबै एकदम अविश्वसनीय छ,” क्यालिफोर्निया विश्वविद्यालय बर्कलेका ग्रह खगोलविद् इम्के डे पाटरले भनिन् ।
“इमानदारीका साथ भन्नुपर्दा हामीले वास्तवमै यो यति राम्रो हुने आशा गरेका थिएनौँ,” उनले थपिन् ।
वैज्ञानिकहरूले आशा गरेका छन् कि वेबमार्फत उनीहरूले ब्रम्हाण्डको सुरुवात देख्न पाउनेछन् । १३.७ अर्ब वर्ष पहिले तारा र आकाशगंगाको निर्माण भएको थियो ।
ग्रह हेर्ने वेधशाला पृथ्वीबाट १.६ लाख किलोमिटर (मिलियन माइल) टाढा रहेको छ ।