काठमाडौं । नेपाली कांग्रेसका सभापति शेरबहादुर देउवाले विधान अनुसार पार्टी संचालन गर्न नसकेपछि चर्चाका काम थालेका छन् । पार्टी विधान अनुसार महाधिवेशनको छ महिनाभित्र पार्टीका विभाग र समितिहरु बनाइसक्नुपर्छ । तर, मंसिरमा सम्पन्न महाधिवेशनपछि अहिलेसम्म कुनै काम नगरेका उनले अहिले भने गृहमन्त्रीसमेत रहेका केन्द्रीय सदस्य बालकृष्ण खाँणलाई नेताहरुसँग छलफल गर्न लगाएर चर्चाको बाटो रोजेका छन् ।
१३औं महाधिवेशनदेखि देउवाको प्रतिपक्ष रहेका रामचन्द्र पौडेल १४औं महाधिवेशनबाट उनी निकट भएर काम गरिरहेका छन् । तर, देउवाले खाँणलाई पठाएर पार्टीका विभाग र समितिहरु बनाउने विषयमा छलफल थालेका हुन् । सभापति निकट रहेका खाँण पार्टीको संगठन विभाग र संसदीय बोर्डमा समेत रहन काम गरिरहेका छन् ।
देउवाले खाँणसहित ज्ञानेन्द्रबहादुर कार्कीलाई समेत बोर्डमा राख्ने वातावरण नबन्दा पार्टीको चुनावमा टिकट बाड्ने सर्वोच्च संस्था संसदीय बोर्ड (समिति)नै बनाएका छैनन् । यसबीचमा आफू निकटकै नेताहरुसँग देउवाले खाँणलाई छलफल गर्न लगाएर वातवरण निर्माणमा सहयोग खोजिरहेका छन् ।
“मुलुकको समसामयिक राजनीतिक र पार्टीको संगठन सुदृढिकरण र क्रियाशील बानाउनेबारे कुराकानी भयो,” खाँणडको भनाइ उदृत गर्दै उनको सचिवालयले भनेको छ ।
पार्टीको विधानमा २८ विभाग गठन गर्ने व्यवस्था भए पनि देउवाले सूचना संचार तथा प्रचार विभाग मात्र गठन गरेका छन् । त्यसबाहेकका विभाग गठन गर्ने तथा अन्य विभागहरु समेत थपेर नियुक्ति दिँदै ४५ विभाग बनाउने र निर्वाचनसम्म पार्टीको तल्लो तहसम्मको बहुमत आफ्नो पक्षमा पारेर आफू निकटलाई धेरै टिकट वितरण गर्ने तयारीमा देउवा छन् ।
देउवाले आफूसँग चुनाव लडेको शेखर कोइराला समूहसँग भन्दा निर्वाचनमा आफूलाई प्रत्यक्ष अप्रत्यक्ष सघाएका रामचन्द्र पौडेल, कृष्ण सिटौला, प्रकाशमान सिंह, विमलेन्द्र निधि र शशांक कोइरालालाई विश्वासमा राख्ने प्रयत्न गरिरहेका छन् ।