काठमाडौं । चौथो ‘डिशहोम बाह्रखरी कथा प्रतियोगिता २०७९’ आह्वान कार्यक्रममा सहभागीहरूले बाह्रखरी कथा प्रतियोगिताले नेपाली कथा साहित्य र लेखन कलालाई नयाँ उचाइमा पुर्‍याउने बताएका छन् । कथाका प्रतियोगिता नगन्य रुपमा हुँदै आएको अवस्थामा आकर्षक पुरस्कारसहितको ‘डिशहोम बाह्रखरी कथा प्रतियोगिता’ले नेपाली कथा साहित्यलाई नयाँ उचाइ र गन्तब्यमा पुर्‍याउने उनीहरूको विश्वास छ । 

निर्णायक समितिका संयोजक प्रा.डा. कुमारप्रसाद कोइरालाले प्रतियोगिताले नेपाली कथा लेखनमा नवीन मोड ल्याउने विश्वास व्यक्त गरे । “यो कथा प्रतियोगिताले लुकेर रहेका नयाँ प्रतिभालाई प्रष्फुटन गराउँछ । लेखनमा उत्प्रेरणा जगाउँछ,” कोइरालाले भने, “कथा लेख्ने व्यक्तिलाई म कुन स्तरको कथा लेखक हुँ भन्ने मूल्यांकनको अवसर पनि दिन्छ ।” 

नेपाली कथा साहित्यमा संख्या धेरै भए पनि गुणस्तरीय कथाको संख्या निकै न्यून रहेको र यसको परिपूरण बाह्रखरी कथा प्रतियोगिताले गर्नेमा उनी ढुक्क छन् । 

कथाले पाठकलाई आफूप्रति आकर्षित गर्नसक्नु पर्नेमा जोड दिँदै उनी अगाडि थप्छन्, “कथा भन्नु मात्रै ठूलो कुरा होइन । गीतले स्रोतालाई आकर्षित गरेजस्तै पाठकलाई आफूप्रति आकर्षित गर्ने कथा नै राम्रो र सशक्त हुन्छ ।” 

सशक्त कथा लेखनका लागि पाठकको रुचि, ध्यान, विषय र प्रस्तुतिलाई केन्द्रमा राख्नुपर्नेमा उनको जोड छ । 

प्रतियोगिताको निर्णायक समिति सदस्य सगुना शाह कथा सबैसँग हुने तर लेखन शैलीमात्रै दिनसक्नु पर्ने बताउँछिन् ।

यसका लागि ‘डिशहोम बाह्रखरी कथा प्रतियोगिता’ले सहयोग गर्ने उनको विश्वास छ । ‘बाह्रखरी कथा प्रतियोगिता’ले देशभरका कथाकारलाई एक ठाउँमा पढ्ने अवसर प्रदान गरिरहेको भन्दै उनी भन्छिन्, “देशभरका कला, साहित्य, संस्कृति र विविधता यो कथा प्रतियोगितामा आएका कथामा पढ्न पाइन्छ । आंचलिकताबारे देशभरका पाठकलाई जानकारी दिँदै नयाँ स्वादका कथा बाह्रखरीको उत्कृष्ट कथामा पढ्न पाइन्छ ।” 

प्रतियोगिताको निर्णायक समिति सदस्य उमा सुवेदीले ‘बाह्रखरी कथा प्रतियोगिता’मा आउने कथाले देशको मुहार देखाउने बताइन् । 

मेचीदेखि महाकालीसम्मका नयाँदेखि पुराना कथाकारका कथा ‘बाह्रखरी कथा प्रतियोगिता’ले मुलधारमा ल्याउन सहयोग गर्ने उनको धारणा छ । आफ्नो ठाउँ र परिवेशको विषय र आफ्नो प्रस्तुतिलाई देशभर फैल्याउने प्रतियोगिता अवसर पनि भएको उनको भनाइ छ । 

डिश होमका कार्यकारी निर्देशक सुदीप आचार्यले नेपाली साहित्यलाई अझै माथि उकास्नु पर्नेमा जोड दिए । अन्तर्राष्ट्रिय साहित्यको अध्ययन गरिरहेका पाठक माझ पनि नेपाली साहित्यलाई पु¥याउन आवश्यक रहेको उनको भनाइ छ । 

जनतालाई साहित्यमार्फत पनि खुसी बनाउने आफ्नो संस्थाको लक्ष्य भएकाले ‘बाह्रखरी कथा प्रतियोगिता’लाई डिश होमले सहयोग गर्दै आएको उनले स्पष्ट पारे । डिश होम ‘बाह्रखरी कथा प्रतियोगिता’को टाइटल स्पोन्सर हो । 

यस कथा प्रतियोगितामा नेपाल इन्भेष्टमेन्ट बैंक र किया मोटर्स प्रायोजकको रुपमा रहेका छन् भने अजोड इन्स्योरेन्स र सिटी एक्स्प्रेस मनि ट्रान्सफर सहप्रायोजक रहेका छन् । 

बाह्रखरी मिडियाका प्रधान सम्पादक प्रतीक प्रधानले आफू साहित्यिक घरानाको व्यक्ति भएको भन्दै साहित्यको श्रीवृद्धिमा योगदान दिने सुरुदेखि नै आफ्नो सोच रहेको बताए । पुरस्कारको धनराशि बढाउँदै लैजानेबारे संस्थाले सोचिरहेको उनले जानकारी दिए । समाचारसँगै साहित्यको विकासमा बाह्रखरी मिडिया सधैँ प्रतिवद्ध रहेको प्रधान सम्पादक प्रधानको भनाइ छ । 

बाह्रखरी डट कमका कार्यकारी सम्पादक गोविन्द अधिकारीले ‘बाह्रखरी कथा प्रतियोगिता’ समकालीन समाजको ऐना भएको भन्दै यसमा जो कसैले पनि सहभागिता जनाउन सक्ने बताए । भुगोल र उमेरले प्रतियोगितामा सभागिता जनाउन नरोक्ने बताएका उनले भदौ १४ गतेसम्म कथा पठाउन सकिने जानकारी दिए । असोज ३० गते ‘बाह्रखरी कथा प्रतियोगिता’को परिणाम घोषणा गरिनेछ । 

बाह्रखरी मिडियाका प्रवन्ध सम्पादक राजेश केसीले प्रायोजक तथा सहयोगी संस्थाहरूको सहयोगकै कारण ‘बाह्रखरी कथा प्रतियोगिता’ चौथो संस्करणसम्म आइपुगेको बताए । साहित्यलाई पनि समाजका अन्य पक्षसँगै सँगसँगै अगाडि बढाउन व्यापारिक घरानाको सहयोग आवश्यक रहेको केसीको भनाइ छ । 

‘बाह्रखरी कथा प्रतियोगिता’ घोषणा कार्यक्रममा प्रतियोगिताको पहिलो संस्करणकी विजेता विना थिङले कथा सधैँ विद्रोही हुनुपर्नेमा जोड दिइन् । विद्रोही र गतिशिल सोच र प्रस्तुति बोकेको कथा मात्रै रुचाइने आफ्नो अनुभव रहेको तामाङले सुनाइन् । 

‘बाह्रखरी कथा प्रतियोगिता’ तेस्रो संस्करणका विजेता मनोजादित्य न्यौपानेले ‘बाह्रखरी कथा प्रतियोगिता’ले आफूलाई नयाँ परिचय र पहिचान दिएको स्मरण गरे । ‘बाह्रखरी कथा प्रतियोगिता’मा प्रथम भएकै कारण अहिले प्रकाशकहरूले कृति प्रकाशनका लागि आग्रह गर्ने गरेको बताए । 

नयाँ पात्र, परिवेश र चरित्रलाई कथामा उभ्याउन र स्थापित गर्न सके पाठकले रुचाउने अधिकतम सम्भावना हुने उनको अनुभव छ । 

प्रतियोगितामा उत्कृट कथाले एक लाख रुपैयाँ, दोस्रोले ६० हजार र तेस्रो कथाले ४० हजार रुपैयाँ प्राप्त गर्नेछ । 

कार्यकारी सम्पादक अधिकारीले ‘बाह्रखरी कथा प्रतियोगिता’ जस्तै अरु पनि कथा प्रतियोगिताको आवश्यकता रहेको औंल्याए । 

यसपटक उत्कृष्ठ २५ कथासँगै उत्कृष्ठ कथा संग्रहमा स्थापित कथाकारहरू डा. ध्रुवचन्द्र गौतम, माया ठकुरी, डा. बेन्जु शर्मा, राजव र अविनाश श्रेष्ठका कथा पनि समावेश गरिनेछ । पाँचजनाका कथा भने प्रतियोगितात्मक कथा हुने छैनन् । बाह्रखरी उत्कृष्ट कथा संग्रहलाई प्रतिनिधिमुलक बनाउन स्थापित कथाकारहरूका कथा समावेश गर्न लागिएको अधिकारीको भनाइ छ । 

बाह्रखरी मिडियाका प्रबन्ध निर्देशक ज्ञानेश्वर आचार्यले निर्णायक मण्डललाई स्वागत गर्दै पुष्पगुच्छा अर्पण गरेका थिए ।
कथा प्रतियोगितामा सहभागीहरुको अन्तिम नतिजा असोज ३० गते काठमाडौंमा एक समारोहका बीच हुने उनले जानकारी गराए ।