काठमाडौं । विश्वका सर्वाधिक धनी व्यक्ति एलन मस्कले ट्विटर कम्पनी खरिद नगर्ने घोषणा गरेपछि ट्विटरले उनीविरुद्ध मुद्दा हाल्ने भएको छ । मस्कले आफूलाई एक पत्र पठाउँदै ४४ अर्ब डलरमा ट्विटर खरिद गर्ने सम्झौता भंग गरेको ट्विटरले बताएको छ ।
शुक्रबार मस्कको टिमले ट्विटरलाई लेखेको पत्रमा ट्विटरले सम्झौता विभिन्न प्रावधानहरूको भौतिक उल्लंघन गरेको हुँदा खरिद सम्झौताबाट पछि हट्ने निर्णय गरिएको दाबी गरिएको छ । मस्कले ट्विटरमा रहेका फेक अकाउन्टहरूको बारेमा प्रष्ट जानकारी मागेकोमा ट्विटरले त्यसको डाटा उपलब्ध गराउन नसकेकाले सम्झौता भंग भएको बताइएको छ ।
केही समयअघि एलन मस्कले ट्विटरमा २० प्रतिशत फेक तथा स्पाम अकाउन्ट भएको दाबी गरेका थिए । जबकि, यो संख्या ट्विटरले दाबी गरेको ५ प्रतिशतभन्दा ४ गुणा धेरै हो । ट्विटरले फेक तथा स्पाम अकाउन्टको यथार्थ विवरण नदिएमा कम्पनी खरिद नगर्ने मस्कले लामो समयदेखि बताउँदै आएका थिए ।
मस्कको एकतर्फी रुपमा सम्झौता भंग गर्ने निर्णयविरुद्धमा ट्वीटर कम्पनीले अदालत जाने भएको हो । ट्विटर कम्पनीका बोर्ड अध्यक्ष ब्रेट टेलर गरेको ट्विटअनुसार एलन मस्कसँग भएको सहमति अनुसारको मूल्य तथा शर्तमा खरिद बिक्री कार्यलाई टुंग्याउन ट्विटर प्रतिबद्ध रहेको र खरिद सम्झौता लागु गराउनका लागि कानुनी कार्बाहीको योजना बनाइरहेको पनि उनले बताएका छन् ।
