काठमाडौं । नेपाल दूरसञ्चार प्राधिकरणले अनुमतिपत्र विना इन्टरनेट सेवा संचालन नगर्न/नगराउन आग्रह गरेको छ ।
प्राधिकरणले दूरसञ्चार ऐन, २०५३ को दफा २१ अनुसार कसैले पनि अनुमतिपत्र नलिई दूरसञ्चार सेवा संचालन गर्न नपाइने कानुनी व्यवस्था रहेको भन्दै अनुमति विना इन्टरनेट सेवा संचालन नगर्न भनेको छ ।
“हाल सामाजिक संजालहरुमा अनुमतिपत्र प्राप्त नगरी विपरित स्याटेलाइट प्रविधिबाट इन्टरनेट सेवाको संचालन वितरण सम्बन्धमा विज्ञापन हुने गरेको भन्ने बुझिन आएको छ । त्यसैले कसैले पनि अनुमतिपत्र प्राप्त नगरी इन्टरनेट सेवा संचालन नगर्नु नगराउनु हुन सूचित गरिन्छ,” प्राधिकरणले सूचना जारी गर्दै उल्लेख गरेको छ, “अनुमतिपत्र प्राप्त नगरी इन्टरनेट सेवा संचालन गर्ने/गराउनेजस्ता गैरकानुनी कार्य गरेको पाइएमा प्रचलित कानुन बमोजिम कारबाही हुनेछ ।”
सेवाग्राहीलाई भ्रममा नपर्न र नेपाल दूरसञ्चार प्राधिकरणबाट अनुमतिपत्र प्राप्त नगरी गैरकानुनी रुपमा कसैले पनि इन्टरनेट सेवा संचालन वा वितरण गरको जानकारी भए जानकारी गराउन पनि प्रधाकिरणले आग्रह गरेको छ ।