काठमाडौं । नेपाली कांग्रेसका बौद्धिक नेता प्रदीप गिरि अर्को साता नेपाल फर्कने भएका छन् । उपचार तथा राजनीतिक भेटघाटका लागि भारत गएका गिरि अर्को साता नेपाल फर्कन लागेको गिरिको पारिवारिक स्रोतले बताएको छ । 

“अहिले नयाँदिल्लीको डेरामै बसिरहनुभएको छ । केही दिन पारिवारिक तथा शुभचिन्तकहरुसँगको भेटघाटमा व्यस्त हुनुहुन्छ,” गिरिका सहयोगी विकास हमालले भने, “उहाँ अर्को पाँच छ दिनमा नेपाल फर्कने तयारीमा हुनुहुन्छ ।” 

हमालले कांग्रेस महाधिवेशनमा गिरिले केन्द्रीय सदस्यमा नै उमेदवारी दिने तयारी गरेको जानकारी दिए । 

“उहाँका विषयमा सबैलाई थाहा भएकै कुरा हो, उहाँ पदको आशक्ति नभएको नेता हो,” हमालले भने, “कांग्रेसको महाधिवेशनमा उहाँको कुनै पदाधिकारी बन्ने तयारी छैन । केन्द्रीय सदस्यमा नै उम्मेदवारी दिनु हुने छ ।” 

साउनमै भारतको नयाँ दिल्ली गएका गिरिले भदौ १ गते मुम्बैको हिन्दुजा अस्पतालमा थाइराइडको उपचार गरिएको थियो ।

मुम्बइमा पाँच दिन मात्र बसेर गिरि नयाँ दिल्ली नै फर्किएका थिए । पारिवारिक स्रोतका अनुसार अहिले गिरिको स्वास्थ्यमा कुनै समस्या छैन । 

भदौ ३ गते कांग्रेस उपसभापति विमलेन्द्र निधि गिरिलाई भेटन भन्दै भारततर्फ लागेपछि गिरिको स्वास्थ्य अवस्थाका विषयमा चर्चा सुरु भएको थियो । तर, गिरिको स्वास्थ्य सुरुवाति चर्चा जस्तो असामान्य नभएको परिवारले बताउँदै आएको छ ।