पोखरा । प्रदेशका २ का आन्तरिक मामिला तथा कानुनमन्त्री ज्ञानेश्वर राय यादवलाई गण्डकीका समकक्षी हरि चुमानले पनि बालुवाटारमा भेटेको खुलेको छ । तर, उनले हालसम्म पीसीआर गराएका छैनन, कार्यक्रममा भने सहभागीता जनाइरहेका छन् ।

मन्त्री चुमानको तर्क छ - “ब्रिफिङ सुन्‍न गएका हौं, तर सामाजिक दूरी अपनाइएको थियो ।”

सामान्य हिसाबले पनि उनी संक्रमितसँगको पहिलो 'कन्ट्याक्ट ट्रेसिङ'मा पर्छन । तर, त्यसयता उनले गृहजिल्ला तनहुँदेखिका धेरै कार्यक्रममा उपस्थित भएका छन् ।

बिहीबार मात्रै मुख्यमन्त्री तथा मन्त्रीसहित सांसदहरु उपस्थित गण्डकी प्रदेशसभा बैठकमा पनि उपस्थित भएर एक विधेयक टेबल गरे ।

'प्राइमरी कन्ट्याक्ट'मा परिसकेपछि पनि स्वाब नदिई कार्यक्रममा उपस्थित किन हुनुभयो भन्ने प्रश्नमा उनले भने, “हामी प्रधानमन्त्री तथा मन्त्रिपरिषदको कार्यालयमा गएका थियौं । त्यहाँ ब्रिफिङ थियो, त्यही सुन्‍न गएका हौं । सँगै कानुन मन्त्रालयमा पनि गयौं । सँगै बसेका होइनौं, एउटै हलमा त थियौं तर सामाजिक दूरी कायम थियो । कानुन मन्त्रालयमा पनि सुरक्षा अपनाइएको थियो । हामी एउटै लाइनमा पनि थिएनौं । संसर्ग भएको त छैन, एउटै गाडी, कोठामा बसेका पनि होइनौं । सुरक्षा मापदण्ड अपनाएर बसेका हौं । त्यस्तो त लाग्दैन, बाहिर के भनेका छन् । केही बुझेको पनि छैन । मलाई पीसीआरका लागि केही भनेका पनि छैनन् । त्यही कुरो नआएको भएर कतै गएको छैन । कन्ट्याक्ट ट्रेसिङमा पर्नुभएको छ भनेर खबर आयो भने जाउँला । धेरै कार्यक्रममा गएको छु ।”

साउन १५ गते बालुवाटारमा प्रहरी समायोजनका विषयमा छलफल भएको थियो । बैठक सकिएको ३ दिनपछि साउन १९ गते मन्त्री यादव जनकपुर फर्किएका थिए । त्यही क्रममा उनले जनकपुरमा कोरोना परीक्षण गराएका थिए । कोरोना पुष्टि भएका मन्त्री यादव अहिले क्‍वाटरमै 'आइसोलेसन'मा बसिरहेका छन् ।

कानुनमन्त्री चुमान ११ साउनमा काठमाडौं गएका थिए । प्रहरी समायोजनसम्बन्धी कार्यक्रममा सहभागी मन्त्री चुमान पोखरा फर्किएको पर्सिपल्टै मुख्यमन्त्री, प्रदेश प्रहरी प्रमुखलगायत सहभागी प्रहरीलाई सवारी हस्तान्तरण गर्ने कार्यक्रममा सहभागी भएका थिए । 

मन्त्री चुमान साउन २० गते गृहजिल्ला तनहुँसमेत पुगेका थिए । मातृशोकबाट गुज्रिरहेका नेकपाका स्थानीय नेतालाई भेट्न कानुनमन्त्री चुमान शुक्लागण्डकी नगरपालिकाको राईपुर गएका थिए ।