पोखरा । बागलुङका ६ जनामा बुधबार एकैपटक कोरोना संक्रमण भेटियो । यसअघि बागलुङमा भेटिएका दुई कोरोना संक्रमित निको भएर घर फर्किइसकेका छन् । वैशाख १३ गतेयता नयाँ संक्रमण नभेटिएको बागलुङमा बुधबार एकैपटक संक्रमण भेटिएका ६ जना नै भारतको सीमामा क्‍वारेन्टाइनमा नै बसेर आएका थिए । बडिगाड गाउँपालिकाका दुई र तमानखोलामा भेटिएका चारजना एकैदिन बागलुङ आएका हुन् ।

भैरहवा र कपिलवस्तुको नाकामा जेठ ८ गतेसम्म क्‍वारेन्टाइन बसेपछि सोही दिन उनीहरूलाई बस रिजर्भ गरेर बागलुङ पठाइएको थियो । उक्त बसबाट ३९ जना बागलुङ प्रवेश गरेका थिए ।

तीमध्ये तमानखोला गाउँपालिकामा आठजना प्रवेश गरे । तीमध्ये चारजनाको रिपोर्ट पोजेटिभ आयो । रिपोर्ट आएका चारजना वडा ३ को धनगौज्योति माविको क्‍वारेन्टाइनमा थिए । बाँकी चारजनाको भने नेगेटिभ आयो । अझै १० जना गाउँपालिकाको क्‍वारेन्टाइनमा छन् । उनीहरूको पनि रिपोर्ट नेगेटिभ आएको गाउँपालिकाका प्रशासकीय अधिकृत प्रभात लामिछानेले जानकारी दिए । 

यता, संक्रमण भेटिएका बडिगाड गाउँपालिकाका दुईजना भने त्रिभुवन माविको क्‍वारेन्टाइनमा बसेका थिए । उनीहरू पनि सोही दिन जेठ ८ गते नै बागलुङ आएका हुन् । गाउँपालिकाका प्रशासकीय अधिकृत बालकृष्ण सुवेदीले आठजनाको स्वाब परीक्षण गर्दा दुईजनामा पोजेटिभ भेटिएको जानकारी दिए ।

“खर्वाङको त्रिभुवन माविमा क्‍वारेन्टाइनमा राखेका हौँ । सबैको स्वाब टेस्ट गरेका छैनौँ । ८ जनाको मात्र स्वाब लिइएको हो,” उनले भने ।

कोरोनामुक्त बनेको एक महिनामै बागलुङमा एकैपटक ६ जनामा संक्रमण

यस्तै, अन्य धेरैको स्वाब टेस्ट गर्नुपर्ने तर भीटीएम उपकरण अभाव भएको उनले जानकारी दिए । “बडिगाडमा अहिले २०० जना क्‍वारेन्टाइनमा छन्, अझै १०० जना आउने भनेका छन् । विद्यालयहरू भरिएका छन् । अझै धेरै बाँकी छन् । भीटीएम मेसिन पनि छैन । जनताहरू बोर्डरमा आएर रुन्छन्, नल्याए हिँडेर पनि आउँछन् । उता फर्कन सम्भव छैन । हामीले यता ल्याएर घेराबन्दीमा राखे सुरक्षा त होला, नत्र गाउँगाउँ पसेर आउँदा झन् खतरा छ,” उनी भन्छन्, “चार ठाउँमा २०० बेडको क्‍वारेन्टाइन बनाएका छौँ । बेड भरिएका छन्, अझै डेढ/दुई सय आउँछन्, आए भने भीमगिठेको विद्यालयलाई क्‍वारेन्टाइन बनाउनुपर्ला नभए लेकतिरका स्कुलमा लग्नुपर्ला । अरू उपाय पनि छैन । खाना बनाउने मान्छे पनि भर्ना गरेका छौँ, गाउँलेहरूले खाना दिने, खाजा दिने, पकाउने ख्वाउने गरेका छन् ।”