पोखरा । गण्डकी मेडिकल कलेजका केही विद्यार्थीहरुले एमबीबीएस प्रथम वर्षको परीक्षा दिएका छन् । बिहीबारदेखि परीक्षा सुरु भएको हो । यहाँ ९५ जना रेगुलर विद्यार्थीसहित कुल एक सय पाँचजना विद्यार्थीहरुले परीक्षा फर्म भरेका थिए । तर, अन्यत्र झैँ यहाँ पनि एमबीबीएस परीक्षा बहिष्कार गर्ने विद्यार्थीहरुले तयारी गरेका थिए । जसमा सबैजना सहमत हुन सकेनन् । कलेजका प्रिन्सिपल रवीन्द्रप्रसाद श्रेष्ठका छोरा पनि जाँचमा सहभागी भएका छन् । 

“जाँच दिने–नदिने विद्यार्थीहरुको कुरा हो  । मेरो छोरा पनि जाँच दिने, छोराको जाँच भएपछि म इन्भल्भ हुन नपाउने, मेरो छोराले त जाँच दियो नि, जाँच त दिने नै हो उनीहरु । मेरो छोरा लगायतका १९ जनाले एमबिबिएसको जाँच दिएजस्तो लाग्छ मलाई । उनीहरु त जाँच दिने नै हुन,” उनले भने ।

परीक्षा बहिष्कारको विषयमा नै बिहीबार नौजना विद्यार्थीलाई प्रहरीले पक्राउ गरेर लगेको थियो । उनीहरुलाई प्रहरीले केही समयपछि रिहा गरेको थियो । क्याम्पस प्रशासनले परीक्षा दिने विद्यार्थीलाई डिष्टर्ब गरेका कारण प्रहरीले लगेको बताएको थियो ।

“परीक्षा हामीले लिने होइन, आईओएमबाट लिने परीक्षा हो, प्रश्नपत्र पनि उतैबाट आउने हो । केही विद्यार्थीहरु परीक्षा दिन गए, विद्यार्थीले जाँच दिन भनेर नै फर्म भरेका हुन्, फर्म आफैँले भरेका हुन्, कतिजनाले बहिष्कार गर्ने भनेका हुन्, केही सिनियरहरु आएर ढोका फोरे ।  सूचना निकालेपछि दिन पाउने अधिकार पनि हुन्छ, जाँच दिन जाँदाखेरि कपी च्यात्न बाहिरबाट गएका विद्यार्थीहरुलाई नै प्रहरीले पक्राउ गरेको हो,” श्रेष्ठले बताए ।

उनका अनुसार बीएस्सी नर्सिङका सबैले परीक्षा दिएका छन् । बीएनसतर्फका विद्यार्थी पनि परीक्षामा सहभागी भएका छन् । श्रेष्ठका अनुसार बीएनको परीक्षा दिन छुटेकाहरुले पुनः परीक्षाको मागसहित चिकित्सा शिक्षा अध्ययन संस्थान (आईओएम) मा निवेदन दिएका छन् ।

उनले यतिमात्र भनेनन्, गण्डकी मेडिकल कलेजका प्रथम र दोस्रो वर्षका विद्यार्थीसँग कुनै समस्या नै नरहेको समेत बताए । जुन कुरा विद्यार्थीहरुको माग र परीक्षा बहिष्कार गर्नुको कारणसँग मिल्दैन ।

श्रेष्ठले बाह्रखरीसँगको कुराकानीमा प्रथम वर्षका विद्यार्थीसँग अतिरिक्त शुल्क नै नलिएको बताए ।

“प्रथम वर्षसँगको समस्या नै छैन, लिएका नै होइनौँ, तर चारपाँच जनाको चाहिँ आएको छ रे त्यो पनि समायोजन गर्छौँ भनेका छौँ । कतिको त गरि पनि सकेका छौँ । प्रथम र दोस्रो वर्षका विद्यार्थीहरुको,” उनले थपे, “पुरानाको हकमा छानबिन गर्न आयोग गठन गर्ने भनेको छ । आयोग गठन भएको पनि छैन । त्यसका आयोग गठन भएर छानबिन गरेपछि बल्ल हुने हो ।”

यता, १० मंसिरमा सरकारले एमबीबीएस र बीडीएसका विद्यार्थीको मात्रै पहिलो र दोस्रो वर्षको शुल्क फिर्ता या समायोजन गर्ने गरी कलेज सञ्चालकसँग सहमति गरेको थियो । विद्यार्थीले भने सबै संकायका सबै ब्याचमा उठाएको बढी शुल्क फिर्ता गरे मात्र परीक्षामा सहभागी हुने माग गर्दै आएका थिए । यसअघि २१ कात्तिकमा तय भएको परीक्षा विद्यार्थी आन्दोलनकै कारण एक महिना धकेलिएको थियो ।

सोही कारण बिहीबार कलेज परिसर आन्दोलनग्रस्त रह्यो । माग पूरा नभएसम्म परीक्षा बहिस्कार गर्ने विद्यार्थीले निर्णय गरेपछि ९ विद्यार्थीलाई प्रहरीले पक्राउ पनि गरेको थियो । पक्राउ परेका एक विद्यार्थीले परीक्षापत्र पनि आउट भइसकेको र कलेज सञ्चालक, प्रिन्सिपलका छोराछोरीसहित जम्मा पाँचजनाले मात्र जाँच दिएको बताए ।

शुल्क समायोजन गरिने भनिए पनि एमबीबीएस तेस्रो र चौथो वर्षमा उठाइएको गैरकानुनी शुल्कबारे केही नबोलिएको, कुन शीर्षकमा उठाइएको कति शुल्क फिर्ता गर्ने सहमति भएको उल्लेख नभएको भन्दै विद्यार्थी आन्दोलनरत छन् ।