राष्ट्रपति विद्यादेवी भण्डारी छिन्नमस्ता भगवतीको दर्शन गर्न जाँदा केही सैनिकले जुत्ता बोकेको तस्बिर सार्वजनिक भएको छ । यी जुत्ता राष्ट्रपति भण्डारी र उनका छोरीहरूको भएको र सेनाकै अधिकारीहरूको आदेशमा ती सैनिकले एक ठाउँबाट अर्को ठाउँमा लगेको सम्बन्धित समाचारमा उल्लेख भएको छ । केही महिना पहिले नेपाल प्रहरी र सशस्त्रका जवानले कुनै व्यक्तिको जुत्ताको तुना बाँधिदिँदै गरेका वा खुट्टा धुन पानी हाल्दै गरेका यस्तै 'अपमानजनक' तस्बिर सार्वजनिक भएका थिए । यसैगरी बहालवाला र पूर्व अधिकृतहरूका घरमा पनि तालिमप्राप्त सुरक्षा कर्मीलार्इ सुसारे बनाउने सामन्ती चलन लोकतान्त्रिक गणतन्त्र नेपालमा समेत कायमै छ ।  एक्काइसौं शताब्दीमा आइपुग्दा पनि राज्यका विभिन्न अंग विशेषगरी सुरक्षा निकायमा मध्ययुगीन सामन्ती सोच र अभ्यास कायमै रहनु दुःखद विडम्बना हो । कठोर अनुशासनका कारण नेपाली सेनालगायतका सुरक्षा निकायका परम्परामा परिवर्तन हुन ढिलो हुनु अस्वाभाविक होइन । तर, मानवीय संकटबाहेक अरू बेलामा कसैको जुत्ता बोकाउनेजस्तो काम राष्ट्रका सुरक्षाकर्मी सैनिक वा प्रहरीलार्इ गराउनु आपत्तिजनकमात्र हैन अमानवीय व्यवहार पनि हो । यसैगरी, सुरक्षा कर्मीलार्इ टहलुवा वा सुसारे बनाउने सोच र अभ्यास पनि अलोकतान्त्रिक एवं अमानवीय हो । संगठनको परम्परा वा अरू कुनै पनि नाममा यस्ता कार्यको औचित्य सिद्ध हुँदैन । हुनत, राष्ट्रका सुरक्षाकर्मीको यस्तो अपहेलना कुनै स्वाभिमानी नागरिकका लागि प्रिय र स्वीकार्य नहुनु पर्ने हो । तर, आफूले सुरक्षाकर्मीलाई कजाउन सुरक्षा निकायका सामन्ती सोच, संस्कार र विचार भएका अधिकृतहरूले अरूलाई पनि त्यस्तै व्यवहार गराउँछन् ।