काठमाडौं । विद्यार्थी नेताहरुले लोकमान सिंह कार्की विरुद्वको महाभियोग प्रस्ताव पारित नभएसम्म आन्दोलन जारी राख्ने बताएका छन् । संयूक्त विद्यार्थी संगठनले माइतीघरदेखि बानेश्वरसम्म महाभियोग प्रस्तावको पक्षमा सांसदहरुलाई मतदान दिन दवाव दिने उद्देश्यले गरिएको र्यालीपछिको कोण सभालाई सम्बोधन गर्दै विद्यार्थी नेताहरुले सो कुरा बताएका हुन् ।  

अखिल (क्रान्तिकारी)का प्रवक्ता सुरेन्द्र बस्नेतले लोकमानविरुद्धको महाअभियोग प्रस्ताव पारित नभएसम्म आन्दोलन नरोकिने जानकारी दिए । 

जुलुसपछि वानेश्वरमा आयोजित विरोध खबरदारी सभालाई अनेरास्ववियुकी अध्यक्ष नविना लामा, अखिल(क्रान्तिकारी)अध्यक्ष नरेन्द्र न्यौपाने, नेविसंघ महामन्त्री कुन्दन काफ्ले, मधेसी विद्यार्थी फोरम अध्यक्ष कप्लेश्वर यादव लगायतले सम्बोधन गरेका थिए । केही दिनयता विद्यार्थी संगठनहरुले कार्की विरुद्व निरन्तर प्रदर्शन गर्दै आएका छन् ।