काठमाडौं । फ्लोरिकल्चर एसोशिएसन नेपालको आयोजना तथा कृषि विकास मन्त्रालयको सहयोगमा कात्तिक १० गतेबाट आयोजना हुने गोदावरी मेलाको तयारी पूरा भएको छ । 

ललितपुरको जावलाखेल खेल मैदानमा ४ दिनसम्म चल्ने १० औं गोदावरी फूलको प्रतियोगितात्मक प्रदर्शनीको तयारी पूरा भइसकेको फ्यान उपाध्यक्ष तथा मेला संयोजक रामजी तिमिल्सिनाले जानकारी दिए । 

दिपावली तथा छट पर्व लक्षित गोदावरी मेलामा प्रतिस्पर्धात्मक, सूचनामुलक तथा व्यावसायिक स्टल गरी ४२ वटा स्टल रहने संयोजक तिमिल्सिनाले आइतबार राजधानीमा आयोजित पत्रकार सम्मेलनमा जानकारी दिए । मेलामा व्यावसायिक स्टल ३६, गोदावरी फूलको प्रतिस्पर्धात्मक प्रदर्शनी स्टल ३ वटा र सूचना मुलक ३  रहेका छन् । 

मेलामा सहभागी व्यवसायीबीच इन्कर्भ, रिफ्लेक्स, स्पाइडर र मिनियचर विधामा प्रतिस्पर्धा गराइ विजयी हुनेलाई नगद, शिल्ड तथा प्रमाणपत्र प्रदान गरिने बताउँदै फ्लोरिकल्चर एशोसिएशन नेपालका अध्यक्ष कुमार कसजु श्रेष्ठले प्रतिस्पर्धाले व्यवसायीलाई हौसला प्रदान गर्ने र पुरस्कारले सम्मान पाउने बिचार ब्यक्त गरे ।