काठमाडौं । अमेरिकाकी एक बयस्क फिल्मकी अभिनेत्रीले अमेरिकी राष्ट्रपतिका लागि रिपब्लिकन पार्टीका उमेदवार डोनाल्ड ट्रम्पलाई यौन उत्पीडनको आरोप लगाएको समाचार संस्था एएफपीले जनाएको छ ।  जेसिका ड्राके नामकी ति अभिनेत्रीले ट्रम्पले उनको होटल कोठामा आउन आग्रह गर्दै दशहजार डलर दिने प्रस्ताव गरेको पनि दाबी गरेकी छन् ।

योसँगै ट्रम्पलाई यौन उत्पीडनको आरोप लगाउने उनी ११ औं महिला भएकी छन् ।  लस एन्जलसमा आयोजित पत्रकार सम्मेलनमा उनले सन् २००६ मा क्यालिफोर्नियाको लेक टाहो भन्ने स्थानमा गल्फ टुर्नामेन्ट भइरहेको बेला ट्रम्पले उनलाई गल्फ कोर्समा उनीसँगै हिड्न लगाएको, होटलमा बोलाएको र उनीसँगै अर्की महिला होटलमा जाँदा ट्रम्पले विनाअनुमति कडा रुपमा समातेर अंगालो मारेको र किस गरेको बताएकी थिइन ।  उनका अनुसार ट्रम्पको होटलको कोठाबाट फर्किसकेपछि पनि ट्रम्पले फेरि फोन गरेको र उनको कोठामा आउन भनेको तथा पार्टीहरुमा बोलाएको दाबी गरेकी छन् ।

ति महिलाकाअनुसार उनले ट्रम्पको प्रस्ताव अस्वीकार गरेपछि  ट्रम्पले उनलाई १० हजार डलर दिने प्रस्ताव गरेको पनि बताइन् । तर ट्रम्पले उक्त आरोप अस्वीकार गरेका छन् ।