विशेष
काठमाडौं । व्यवस्थापिका–संसद्मा दर्ता भएको महाभियोगको प्रस्तावका विषयमा कांग्रेस र माओवादी केन्द्रले निर्णय नगर्दा संसद्को कार्यसूची अन्यौलमा परेको छ । बिहीवार नै महाभियोग प्रस्ताव व्यवस्थापिका– संसद्मा पेस गर्ने कार्यसूची तय भएको थियो । तर सभामुख ओनसरी घर्तीलाई प्रधानमन्त्री पुष्पकमल दाहाल प्रचण्डले तीन दिन संसद्को बैठक स्थगित गरिदिन आग्रह गरेका थिए ।
त्यसपछि सभामुख घर्तीले सूचना टाँस गरेर संसद्को बैठक स्थगित गर्न सचिवालयलाई निर्देशन दिएकी थिइन् । संसद्को बैठक आज विहान ११ बजेका लागि बोलाइएको भए पनि अहिलेसम्म कांग्रेस र माओवादी केन्द्रले निर्णय गर्न सकेका छ्रैनन् । कांग्रेसले केन्द्रीय समितिको बैठक जारी रहेको भन्दै निर्णय गर्न सकेको छैन भने माओवादी केन्द्रले निर्णय गर्ने अधिकार अध्यक्ष दाहाललाई दिएको छ ।
प्रधानमन्त्री दाहाल र कांग्रेस सभापति देउवाबीच शनिबार बेलुका प्रधानमन्त्री निवास बालुवाटारमा भेटवार्ता गरेर आइतबार बिहान बस्ने बैठकमा प्रस्ताव पेस गरेर सभामुखले छलफलको मिति र समय तय गर्ने भन्ने बारेमा छलफल भएको बालुवाटार स्रोतले जानकारी दिएको छ ।
तर यस्तो महत्वपुर्ण विषय संसद्मा प्रवेश गर्दा पनि सभामुखले प्रमुख सचेतकहरुसँग छलफल नगरेको भन्दै कांग्रेसले असन्तुष्टि जनाएको छ ।
“यस्तो महत्वपूर्ण विषय संसद्मा पेस भएको छ,” कांग्रेस प्रमुख सचेतक चिनकाजी श्रेष्ठले बाह्रखरीसँग भने, “तर अहिलेसम्म सभामुखले छलफल समेत गर्नुभएको छैन । किन ?”
उनले संसद्को सम्भावित कार्यसूचीमा राखिएकाले आजको संसद्को बैठकमा महाभियोग प्रस्ताव पेस हुन सक्ने बताए ।
सभामुख घर्तीका प्रेस सल्लाहकार वविन शर्माले पनि आजको बैठकमा महाभियोग प्रस्तावका विषयमा सभामुखले छलफलको मिति र समय तय गर्ने जानकारी दिए ।
प्रकाशित मिति: आइतबार, कात्तिक ७, २०७३ ०७:५७
प्रतिक्रिया दिनुहोस्