बाह्रखरी समीक्षा
लोकमानसिंह कार्कीलाई महाभियोग लगाउन नेकपा (एमाले) तथा नेकपा (माओवादी केन्द्र)का सदस्यले प्रस्ताव पेस गरेसँगै नेपालको राजनीतिमा नयाँ तरंग आएको छ । हिजो दिनभर अख्तियार दुरुपयोग अनुसन्धान आयोगका हाल निलम्बित प्रमुख आयुक्तलाई कुन दलले समर्थन गर्छ र कुनले गर्दैन भन्ने चर्चा चलिरह्यो । कार्कीमाथि महाभियोग लगाउने प्रस्ताव पेस हुनेबित्तिकै संसद् स्थगित भयो र नेपाली कांग्रेस तथा माओवादी केन्द्रको बैठकमा यही विषयमा कुरा चल्यो । आजका दैनिक पत्रिकाले कुन समाचारलाई महत्व दिएका छन् ?, समाचार कसरी सम्प्रेष्तित गरेका छन् भन्ने हेरेपछि कुन पत्रिकाको झुकाव कतातिर छ भन्ने सहजै बुझ्न सकिन्छ ।
आज कान्तिपुरले मुख्य समाचारको शीर्षक नै ‘कार्कीलाई जोगाउन सकिन्न : देउवा’ राखेको छ । कान्तिपुरमा कुलचन्द्र न्यौपानेले प्रेषित गरेको समाचारअनुसार नेपाली कांग्रेसका सभापति शेरबहादुर देउवाले कार्कीको विरोध गरेको देखिन्छ । शाही आयोगले जसरी मनपरी ढंगले समानान्तर सरकार चलाएको, कर्मचारीतन्त्रमा आतंक मच्चाएको र जतिपल्ट सम्झाउँदा पनि नमानेको कारण कार्कीलाई सम्झाउन नसकिने देउवाको धारणा समाचारबाट बाहिर आएको छ । सो समाचारअनुसार कांग्रेसका युवा नेताहरू गगन थापा तथा विश्वप्रकाश शर्माले कुनै पनि हालतमा कार्कीको समर्थनमा नेपाली कांग्रेस उत्रन मिल्दैन भनेर केन्द्रीय समितिको बैठकमा सशक्त ढंगले विचार प्रस्तुत गरेका छन् । गगन थापाले कार्कीको नियुक्तिका बेला गरेको भुल सच्याउने उपयुक्त अवसर आएको विचार प्रस्तुत गरे भने विश्वप्रकाश शर्माले महाभियोगको पक्षमा निर्णय लिन नसके नेपाली कांग्रेसलाई ठूलो राजनीतिक क्षति हुने बताए ।
कान्तिपुरले अर्को सबैलाई चासो भएको समाचार पनि प्रथम पृष्ठमा प्रकाशित गरेको छ – त्यो हो अब कार्कीको सर्वोच्चमा भएको मुद्दाको अवस्था के हुन्छ ? कान्तिपुरका कृष्ण ज्ञवालीले लेखेको समाचारअनुसार महाभियोगले उनको कार्य क्षमताको आधारमा निर्णय लेला तर अदालतले भने योग्यता परीक्षणको कानुनी व्याख्या गर्ने र योग्यता नपुगेको भए परमादेश जारी गर्ने हो । त्यसैले महाभियोगको प्रस्ताव जसरी अघि बढेको भए पनि सर्वोच्चको मुद्दा रोकिने अवस्था देखिँदैन ।
आज नागरिकले ब्यानर हेडलाइन बनाएर त्यसको महाभियोगको पक्षमा उभिन कांग्रेसमा दबाब भन्ने शीर्षक राखेको छ । नागरिकले देउवाको अन्य भनाइसहित थप एक भनाइ पनि राखेको छ । देउवालाई उद्धृत गर्दै एउटा स्रोतले भन्यो, कार्कीले आफूलाई शाही शासनकै बेला पटक पटक दुःख दिएको र अख्तियार प्रमुख भएपछि उनलाई यस्तो कार्य नगर्न सम्झाएको बताएका थिए ।
राजधानी दैनिकले पनि महाभियोगमा देउवा सहमत भन्ने ब्यानर समाचार प्रकाशित गरेको छ । समाचारअनुसार नेपाली कांग्रेस दलभित्र केही अप्ठेरो भए पनि आफूले केन्द्रीय समितिबाटै महाभियोग अनुमोदन गराउने निर्णय गर्छु भनेर प्रधानमन्त्री पुष्पकमल दाहाललाई देउवाले बताएका थिए । त्यस्तै राजधानीले एमालेका अध्यक्ष तथा पूर्व प्रधानमन्त्री केपी शर्मा ओलीको विचार प्रस्तुत गर्दै महाभियोग प्रस्ताव सोची, विचारी आवश्यकताका आधारमा ल्याइएको र अब एमालेसँग यस विषयमा ‘ब्याक गियर’ छैन भनेको समाचार प्रकाशित गरेको छ ।
गोरखापत्रको मुख्य समाचारअनुसार महाभियोग प्रस्तावसम्बन्धी छलफल आइतबार हुने बुझिएको छ । यो प्रस्ताव अघि कसरी बढाउने भनेर प्रमुख दलबीच छलफल गर्न संसद्को बैठक तीन दिनका लागि स्थगित गरिएको र अब आइतबार दलहरू एउटा धारणासहित अघि बढ्ने देखिएको छ ।
कमाण्डर पोष्टले पनि देउवाको भनाइलाई मुख्य समाचार बनाएको छ । तर हिमालय टाइम्सले ‘महाभियोगबारे कांग्रेसमा मतभेद’ शीर्षक राखेर समाचार बनाएको छ । यो समाचारको मुख्य जोड कांग्रेसमा यस विषयमा मतभेद छ भन्नेमा रहेको छ । अन्नपूर्ण पोस्टले संसद् किन स्थगित भयो भन्ने मुख्य समाचार बनाएको छ भने नयाँ पत्रिकाले महाभियोगबारे दलका नेताले के के भने भन्ने विषयमा समाचार बनाएको छ ।
पूर्व राजाको समाचारको महत्व
आजका दैनिक पत्रिका अध्ययन गर्दा पूर्व राजाको समाचारलाई कसले कति महत्व दिन्छ भनेर जान्न पनि मद्दत पुग्छ । साथै कसले कस्तो शीर्षक राखेर कसरी प्रस्तुत ग¥यो भनेर पनि अध्ययन गर्ने अवसर जुटेको छ ।
आजको अन्नपूर्ण पोस्ट तथा नयाँ पत्रिकाले पूर्व राजाको समाचारलाई क्रमशः पाँच कोलम र तीन कोलमको दोस्रो मुख्य समाचार बनाएका छन् । अन्नपूर्ण पोस्टले समाचार शीर्षक माथिको इन्ट्रोमा “हिन्दु अधिराज्यको एजेन्डासहित अन्तर्राष्ट्रिय महासम्मेलन” राखेर पत्रिकाको वैचारिक अडान पनि देखाएको छ । अझ पशुपतिमा भएको कार्यक्रमको समाचारको बीचमा टुँडिखेलमा राष्ट्रपति विद्या भण्डारीले वैदिक सभ्यताको वकालत गरेको र त्यसले अप्रत्यक्षरूपमा हिन्दु एजेन्डा बोकेको सन्देश दिने भनेर पत्रिकाले समाचारलाई विचारमा परिणत गरेको छ ।
नयाँ पत्रिकाले तीन कोलमको दोस्रो मुख्य समाचारमा ‘धर्म राजनीतिमा पूर्वराजा ज्ञानेन्द्र’ भन्न शीर्षक दिएर पूर्व राजाले बोलेको निषेधको राजनीतिले विद्रोह जन्मिने चेतावनीलाई सब हेडलाइन बनाएर कलर बक्स पनि बनाएको छ । देशमा भएको चरम बाह्य हस्तक्षेपमाथि जनताले प्रश्न गर्ने बेला आयो भनेर ज्ञानेन्द्र शाहको भनाइलाई पनि नयाँ पत्रिकाले बक्स समाचार बनाएको छ ।
हिमालय टाइम्सले पूर्व राजाको समाचारलाई प्रथम पृष्ठमा चार कोलम र करिब आधा पेजको एन्कर बनाएको छ । राजधानीले यो समाचारलाई तीन कोलमका एन्कर बनाएको छ । गोरखापत्र तथा कमाण्डर पोष्टले यो समाचारलाई मुख्य तस्विर मुनिको एक कोलमस्थान दिएका छन् ।
प्रकाशित मिति: शुक्रबार, कात्तिक ५, २०७३ १०:१०
प्रतिक्रिया दिनुहोस्