देश
काठमाडौं । थारु समुदायमा पाइने वशांणुगत रोग सिकलसेल एनिमिया र थाल्सिमिया रोगको पहिचान अब नेपालमै सुरु भएको छ ।
राष्ट्रिय जनस्वास्थ्य प्रयोगशालाले पहिलो पटक रोगको रगत परीक्षण गर्न सुरु गरेको हो । प्रयोगशाले रगत परीक्षणका लागि मेसिन खरिद गरेर रगत जाँच सुरु गरिसकेको छ ।
प्रयोगशालाले सेती अञ्चल अस्पतालमा रगत परीक्षणका मेसिन पठाइसकेको प्रयोगशालाका निर्देशक डा. गीता शाक्यले जानकारी दिइन् । उनका अनुसार भेरी अञ्चल अस्पतालमा एक महिनापछि सुरु हुनेछ भने लुम्बिनी अञ्चल अस्पतालमा आगामी वर्षबाट सुरु हुनेछ ।
सरकारले वजेट भाषणमा ५ वटा जिल्लाका २० हजार जनाको स्क्रिनिङ गरेर डीएनए परीक्षणको कार्ड उपलब्ध गराउने घोषणा गरेको थियो । त्यही अनुरुप रगतको परीक्षण गरेर रोगको पहिचान गर्ने शाक्यको भनाइ छ ।
प्रयोगशालाले ३ वटा मेसिन खरिदमा ४० लाख खच गरेको छ । सरकारले सिकलसेल एनिमिया र थाल्सिमिया रोग पहिचानका लागि २ करोड रकम छुट्याएको छ ।
सिकलसेल एनिमिया आमाबुबाबाट छोराछोरी सर्ने गर्दछ । सिकलसेल एनिमिया भएका व्यक्तिबीचको विवाह हुन नदिने र सन्तान जन्माउन नदिनुनै यस रोगबाट बच्ने उपाय हो ।
जोर्नी सुन्निने, हेमोग्लोबिनको कमी, रक्तअल्पता हुनु पेट बारम्बार दुखिरहनु, जन्डिस, पटकपटक रगत चढाउनुपर्ने अवस्था आउनु, छाती, कमर दुख्नु र बुढापाकामा पक्षघात हुनु, स्नायु रोग सम्बन्धी लक्षण देखा पर्नु सिकलसेल एनिमियाको लक्षण हुन् ।
प्रकाशित मिति: शुक्रबार, असोज १४, २०७३ १८:४१
प्रतिक्रिया दिनुहोस्