काठमाडौं । प्रधानमन्त्री पुष्पकमल दाहालको भारत भ्रमणको क्रममा दुई देशबीच भएको २५ बुँदे  संयूक्त विज्ञप्ति खारेज गर्न माग गर्दै नयाँ शक्ति नेपालले शुक्रबार दिउँसो राजधानीमा १ घण्टा धर्ना दिएको छ । राजधानीस्थित भद्रकालीमा धर्ना बस्दै सो पार्टीका संयोजक बाबुराम भट्टराईले २५ बुँदे संयूक्त विज्ञप्तिले नेपालाई भुटानिकरणतर्फ लगेको बताएका छन् । 

विज्ञप्तिको ११ औं नम्बरको बुँदाले अन्य देशसँग सम्बन्ध राख्दा नेपाल र भारतबिच एकरुपता हुनु पर्ने व्यवस्था भएको उल्लेख गरेको भन्दै भट्टराईले सो सहमतिले नेपालको राष्ट्रिय स्वाधिनतामा आँच पु¥याएको बताएका छन् । उनले भने, “२५ बुँदे संयूक्त विज्ञप्तिले नेपालको राष्ट्रिय स्वाधिनतामा आँच मात्र पुर्याएको छैन । नेपाललाई भारतीय सुरक्षा क्षेत्रभित्र राख्दै नेपाललाई भुटानिकरण गर्ने दिशा तर्फ अगाडि बढाएको छ ।” भट्टराईले सो विज्ञप्तिको ७,१०,११,१२,१३ र १४ बुँदा खारेज गर्न माग गरेका हुन् ।

नयाँ शक्ति नेपालले सरकारले पुरानै इलाकाहरुलाई गाउँपालिका र नगरपालिका बनाउने गरी ऐन संशोधन गर्ने निर्णयको खारेजी गर्न माग गरेको छ । धर्ना समापन पछि पञ्चायतकालीन इलाकाहरुलाई व्युँताउने निर्णय गर्नु संघियताको मर्म विपरित भएको आरोप लगाएका हुन् । 

यातायात क्षेत्रमा भएको सिण्डिकेटको खारेजीको माग गर्दै नयाँ शक्ति नेपालले भूकम्प पिडितलाई ५ लाख राहत र सहुलियत रुपमा ५ लाख ऋण उपलब्ध गराउन माग गरेको छ  । नयाँ शक्ति नेपालले प्रत्यक्ष कार्यकारि प्रमुखले मात्र नेपालको विकास गर्न  सक्ने जनाउँदै सो को लागि चाँडै नै आन्दोलन गर्ने पार्टीका संयोजक भट्टराईले बताएका छन् ।