साहित्य
काठमाडौं । बलिउडमा नाम, इज्जत र पैसा कमाएर संसारभर चिनिएकी नेपाली अभिनेत्री मनिषा कोइराला विक्रम योगको प्रशिक्षक बन्ने क्रममा थाइल्यान्डको काउल्याकमा पुगेकी छन् ।
बलिउड सिनेमाको सुन्दरतम अभिनेत्रीको रुपमा प्रख्यात कोइरालाले सिनेमा खेल्न कम भएपछि नेपालमा आएर विवाह गरेकी थिइन् । उनको वैवाहिक जीवन सफल भएन । तर, प्राणघातक क्यान्सरलाई पराजित गर्न सफल भएकी मनिषाको जीवनभने धेरैका लागि उत्प्रेरक बन्यो ।
सिनेमाकी कलाकार हुँदा रक्सी र चुरोटको लतले निकै बदनामी कमाएकी कोइराला पछिल्ला दिनमा शुद्ध शाकाहारी भएकी छन् । उनको जीवनयापनको शैली नै सम्पूर्णरूपमा बदलिएको छ । कुनैबेला कहिले कुलत, कहिले पतिसँगको सम्बन्ध र कहिले क्यान्सरले सौन्दर्यमा समेत प्रभाव पारिसकेको भनिएकी कोइराला हालै देखिएको भिडियोमा पुनः स्वस्थ्य र सुन्दर देखिएकी छिन् ।
कोइराला आफैँले उनको फेसबुक पेजमा पोस्ट गरेको भिडियोमा आफू विक्रम योगको प्रशिक्षकको तालिम लिने क्रममा रहेको बताएकी छन् । आफैले सेल्फी खिचेको जस्तो देखिने भिडियोमा उनी कुनै होटलको कोठामा देखिन्छिन् । ग्रे कलरको पुलओभर लगाएकी कोइरालाले उक्त भिडियोमार्फत् उनका प्रशंसकसँग अंग्रेजीमा कुरा गरेकी छिन् । योगको गुरुको तालिम लिए पनि उनी आफैँले सिकाउने कुरामा निश्चित छैनन् । भिडियोमा भन्छिन्, “म प्रशिक्षक बनुँला जस्तो त लाग्दैन, तर के हुन्छ कसलाई के थाहा ?”
योगले शरीर, मन र मस्तिष्कलाई जोड्ने हुनाले आफूलाई योगले आकर्षित गरेको र विक्रम योगमा मांसपेसी र इच्छाशक्तिको पनि जरुरत पर्ने हुनाले यसमा उनको विशेष अभिरुचि देखिन्छ ।
रोग लागेपछि उनले आफ्नो शरीरका लागि हरेक वर्ष एक महिना दिने प्रण गरेकी र त्यसैअनुसार अहिले विक्रम योग गर्न आएकी मनिषा यो प्रशिक्षणका लागि भने दुई महिना समय लाग्ने बताउँछिन् ।
उनको अनुहारमा स्वस्थता तथा मुहारमा चमक फिर्ता आएको भए पनि उमेरका धर्का बिस्तारै देखिन थालेको पनि सो भिडियोमा देखिन्छ ।
बिना मेकअप एकदमै साधारण रूपमा खिचेकी यो भिडियोलाई उनका करिब ४० हजार प्रशंसकले हेरेका छन् । उनले उक्त भिडियोबाहेक विक्रम योगको प्रशिक्षणका क्रममा खिचेका अन्य भिडियो पनि फेसबुकमा पोस्ट गरेकी छन् ।
प्रकाशित मिति: शुक्रबार, असोज १४, २०७३ १३:०५
प्रतिक्रिया दिनुहोस्