राजनीति
काठमाडौं । उद्योग मन्त्री नवीन्द्रराज जोशी नेपालका लागि भारतिय राजदूत रणजीत रायबीच भेटवार्ता भएको छ । भेटमा उद्योगमन्त्री जोशीले भारतीय लगानी नेपालमा भित्र्याउन पहल गरिदिन आग्रह गरे ।
नेपालमा औद्योगिक विकासको सम्भावना रहेको भन्दै मन्त्री जोशीले औद्योगिक वातावरण निर्माणका लागि उद्योग मन्त्रालयले काम गरिरहेको बताए । अहिले उद्योग मन्त्रालय नीतिगत सुधारको प्रकृयामा रहेको भन्दै मन्त्री जोशीले यसका लागि छिट्टै संसदबाट औद्योगिक व्यवसाय सम्वन्धी कानूनलाई संशोधन र एकीकरण गरी बनेको विधेयक २०७१ पास गर्न लागिएको बताए ।
औद्योगिकरणका माध्यमबाट आर्थिक सम्वृद्धि हासिल गर्ने दिशामा केन्द्रीत गर्न लागिएको भन्दै उद्योग मन्त्री जोशीले विदेशी लगानी आकर्षित गर्न विदेशी लगानी सम्वन्धी विद्यमान कानूनमा समेत समसामयीक सुधार गर्न लागिएको वताए ।
भेटमा रायले लगानी प्रकृयामा देखिएका प्रकृयागत झन्झटहरुलाई समाधान गर्न सुझाव दिए । भारतमा रहेका लघु, घरेलु तथा साना उद्योगको अनुभवले नेपालका लघु, घरेलु तथा साना उद्योगको विकासका लागि फलदायी हुन सक्ने भएकाले ती संस्थाहरुबीच अनुभव आदन प्रदानका लागि काम गर्न सकिने बताए ।
प्रकाशित मिति: बुधबार, असोज १२, २०७३ १५:२२
प्रतिक्रिया दिनुहोस्