विशेष
काठमाडौं । पूर्वगृहमन्त्री माधव घिमिरे चढेको गाडी दुर्घटनास्थल नजिकैबाट ११ दिनअघि एउटा ट्रक र २ वर्षअघि खसेको ग्यासको बुलेट पनि अहिलेसम्म फेला परेको छैन ।
सशस्त्र प्रहरीका एसएसपी रामराजा सुवालका अनुसार ११ दिनअघि सोही ठाउँबाट एउटा ट्रक खसेको थियो भने २ वर्षअघि ग्यास बुलेट पनि खसेको थियो । अहिलेसम्म ती गाडीको अवस्था पनि पत्तो लागेको छैन ।
सशस्त्र प्रहरीका एसएसपी गणेश थापाले ११ दिनअघि ना ३ ख ६०१७ नम्बरको ट्रक पनि सोही स्थानबाट त्रिशूलीमा खसेको र अहिलेसम्म फेला नपरेको बताए ।
पूर्वगृहमन्त्री घिमिरे चढेको गाडी आइतबार साढे ४ बजे खसेको थियो । घिमिरेका दुई भाइसमेत गरी तीन जनाको अवस्था अहिलेसम्म पनि पत्ता लाग्न सकेको छैन । भाइहरु मोहन घिमिरे र प्रकाश घिमिरे पनि बेपत्ता छन् । नेपाली सेनाका ७० र सशस्त्र प्रहरीका ५० जनाले अहिले पनि त्रिशूलीमा खोजी कार्य जारी राखेका छन् ।
उनीहरुले मोटरबोट र डुंगाबाट खोजी जारी राखेका छन् । गाडी खसेको स्थानभन्दा करिब सय मिटर तलसम्म खोजी भइसकेको सशस्त्र प्रहरीका डीआईजी सुबोध अधिकारीले जानकारी दिए ।
दुर्घटनास्थलमा पुगेका भौतिक योजना तथा यातायातमन्त्री रमेश लेखकले विदेशबाट गोताखोर बोलाएर भए पनि पूर्वगृहमन्त्रीको खोजी गरिने बताए ।
प्रकाशित मिति: सोमबार, असोज १०, २०७३ १३:२१
प्रतिक्रिया दिनुहोस्