काठमाडौं । बलात्कारपछि हत्या भएको २४ दिनपछि कञ्चनपुरकी निर्मला पन्तको हत्यामा संलग्न एकजना पक्राउ परेका छन् ।
लामो दबाबपछि प्रहरीले हत्यामा संलग्न भएको आरोपमा एकजनालाई पक्राउ गरेको छ । प्रहरी स्रोतका अनुसार पक्राउ परेका व्यक्ति केन्द्रीय अनुसन्धान ब्यूरोको नियन्त्रणमा छन् ।
प्रहरीले उनको नाम खुलाएको छैन । प्रहरी स्रोतका अनुसार पक्राउ परेका व्यक्तिलाई सार्वजनिक गर्ने तयारी छ । गत साउन १० गते घरबाट साथीको घरमा विज्ञान विषयको उत्तरपुस्तिका लिन गएकी १३ वर्षीया निर्मला पन्त ११ गते मृत अवस्थामा फेला परेकी थिइन् ।
कञ्चनपुरको भीमदत्त नगरपालिका २ की निर्मला भीमदत्त नगर १८ मा रहेकी साथी रोश्नी वमको घरमा गएकी थिइन् । साथीको घरमा गएकी निर्मला अर्को दिन उखुबारीमा मृत अवस्थामा फेला परेकी थिइन् ।
जिल्ला प्रहरी कार्यालय कञ्चनपुरका डीएसपी ज्ञानबहादुर सेठीले आफु कार्यालय बाहिर रहेकाले पक्राउ परे–नपरेको जानकारी नभएको बताए । गत साउन ११ गतेदेखि नै कञ्चनपुरमा नागरिक समाज, महिला अधिकारकर्मी लगायतले निर्मलाको हत्यारालाई पत्ता लगाउनुपर्ने माग गर्दै प्रर्दशन गर्र्दै आएका छन् ।