काठमाडौं । नेपाल बंगलादेश बैंकको सद्भावना दूतमा नेपाली राष्ट्रिय क्रिकेट टिमका सदस्य वसन्त रेग्मी र शरद भेषवाकरलाई घोषणा गरेको छ । वसन्त र शरदलाई बैंकले २ वर्षका लागि आफ्नो सद्भावना दूत बनाएको हो ।
वसन्त र शरदले नेपाली क्रिकेटमा गरेको योगदानको कदर स्वरुप बैंकले सद्भावना दूत बनाएको बैंकका प्रमुख कार्यकारी अधिकृत ज्ञानेन्द्रप्रसाद ढु्ङ्गानाले बताएका छन् ।
नेपालमा पछिल्लो समय क्रिकेट क्रेज बढ्दै गएको बताउँदै यसैलाई मध्यनजर गरी बैंकले खेलाडीसँग सहकार्य गरेको उनले बताए । यसअघि पनि केही बैंकहरुले विभिन्न खेलका खेलाडीलाई आफ्नो सद्भावना दूत बनाएको भन्दै आफूहरुले पनि त्यसैको निरन्तरतामा साथ दिएको उनले बताए ।
वसन्त र शरदले बैंकले आफूहरुलाई आवद्ध गर्दै नेपाली क्रिकेट क्षेत्रका लागि गरेको सहयोगका लागि धन्यवाद दिँदै आफूहरुले बैंकका लागि सक्दो सहयोग गर्ने बताएका छन् ।
पछिल्लो समय युवा खेलाडीहरुमा क्रिकेट प्रतिको उत्साह बढ्दै गएको र त्यसलाई थप अगाडि बढाउन बैंकले सहकार्य गरेको कार्यकारी अधिकृत ढुङ्गानाले बताएका छन् ।