बीबीसी । पृथ्वीमा घुमिरहेको रुसको एक स्याटलाइटले रहस्यमय व्यवहार देखाएपछि अमेरिकी विभागले यसप्रति चिन्ता व्यक्त गरेको छ । धेरैपटकको निरीक्षणपछि पनि त्यो कस्तो वस्तु हो भन्ने निश्चित थाहा नभएको र पत्ता लगाउने कुनै तरिका पनि नभएको अमेरिकी प्रशासनले बताएको हो । त्यसैकारण त्यो रुसद्वारा निर्मित कुनै आधुनिक हतियार हुन सक्ने सम्भावना रहेको विज्ञहरुले बताएका हुन् ।
रुसले भने अमेरिकालाई बिना कुनै प्रमाण यस्तो आरोप नलगाउन चेतावनी दिइरहेको छ । उक्त स्याटलाइट गत वर्षको अक्टोबरमा लन्च गरिएको थियो । तर अन्तरिक्षमा त्यसको जस्तो अनौठो र अप्रत्यासित गतिविधि अन्य कुनै उपकरणको नरहेको बताइएको छ । त्यसैले पनि अरु रुसी स्याटलाइटको तुलनामा त्यसको अवस्था,र क्षमता असामान्य भएको पत्ता लागेको हो जसकारण अमेरिकाको शंका झनै बढ्दै गएको बताइएको हो । स्याटलाइटलाई लिएर रुसको रणनीति पहिलेदेखि नै प्रष्ट नभएकाले पनि यो विषय समस्या बन्दै गइरहेको अमेरिकी हतियार नियन्त्रण विभागकी सहसचिव यलिम पोब्लेटको भनाइ छ । यसअघि रुसी अन्तरिक्ष सेनाका कमान्डरले पनि नयाँ प्रकारका हतियार अपनाउनु नै स्पेस फोर्सको प्रमुख लक्ष्य भएको उल्लेख गरेका थिए ।
अन्तरिक्षका हतियारले बन्दुक जस्ता परम्परागत अस्त्र भन्दा धेरै ठूलो नोक्सान पुर्याउन सक्ने भएकाले पनि विश्वका लागि एकदमै खतरनाक मानिएको विश्लेशकहरुले चेतावनी दिएका हुन् । त्यसले विभिन्न किसिमका विकिरणहरु फाल्ने हुँदा अन्य स्याटलाइटहरुको काममा समेत रोकावट ल्याउन सक्छ भने सधैँका लागि नष्ट समेत गर्दिन सक्ने बताइएको छ ।
तरपनि अन्तरिक्षमा भएका यस्ता उपकरणहरुको जानकारी गोप्य राखिने हुँदा हतियारबारे पत्ता लगाउन धेरै कठिन हुने गरेको बताइएको छ । यसअघि राष्ट्रपति ट्रम्पले घोषणा गरेको अमेरिकी अन्तरिक्ष सेना भने शान्तिपूर्ण रहेको दाबी गरिएको छ । तर अर्कोतर्फ चीन र रुसले चाहिँ गोप्य रुपमा हतियार निर्माणका काम अघि बढाएर विश्वलाई खतरामा पारिरहेको ट्रम्प प्रशासनले आरोप लगाउँदै आएको छ ।
https://www.bbc.com/news/technology-45194333