एजेन्सी । १८ औं एसियाली खेलकुद प्रतियोगिताको पुरुष फुटबलमा आफ्नो दोस्रो खेलमा पराजित भएसँगै नेपाल एसियन गेम्सबाट बाहिरिने सम्भावना बढेको छ । इन्डोनेसियाको जकार्तामा भएको खेलमा नेपाल भिएतनामसँग २–० गोलअन्तरले पराजित भएको हो ।
भियतनामका लागि आन दुक एग्युऐनले खेलको ३१ औं मिनेटमा पहिलो गोल गर्दै भियतनामलाई अग्रता दिलाए । त्यस्तै, खेलको ६४ औं मिनेटमा भियतनामका लागि फान भान दुकले दोस्रो गोल गरे जुन गोल भियतनामको जितका लागि निर्णायक बन्यो ।
पहिलो हाफको समयमा सम्हालिन नसक्दा नेपालले भियतनामलाई रोक्ने अवसर गुमायो । पहिलो हाफमा भियतनामले केही उत्कृष्ट सर्ट प्रहार गरेको थियो । पहिलो हाफमा १–० गोलअन्तरले पछि परेको नेपालले दोस्रो हाफमा पनि भिएतनामलाई रोक्न असमर्थ रह्यो ।
भिएतनामका खेलाडीले प्रहार गरेको सर्टलाई कप्तान तथा गोलरक्षक किरण कुमार चेम्जोङले उत्कृष्ट बचाउ गर्न नसक्दा दोस्रो हाफमा अर्को गोल भयो । उक्त गोलसँगै नेपाल २—० गोल अन्तरले पराजित भयो । भने अब माथिल्लो चरण प्रवेशमा कठिन भएकोछ ।
यसअघि नेपाल जापानसँग १—० गोल अन्तरले पराजित भएको थियो । यस्तै, नेपाललाई पराजित गरेसँगै भियतनाम माथिल्लो चरण प्रवेश गरेको छ । यसअघि भियतनामले पाकिस्तानलाई ३—० गोल अन्तरले पराजित गरेको थियो ।
नेपालले रक्षात्मक खेल खेलेपनि भियतनामलाई रोक्न भने सकेन । एसियन गेम्सअन्तर्गत पुरुष फुटबलको समूह डि मा नेपालसहित जापान, भियतनाम र पाकिस्तानसँग रहेका छन् । नेपालले समूह चरणको अन्तिम खेलमा पाकिस्तानसँग अगष्ट १९ मा खेल्दैछ ।