काठमाडौं । राष्ट्र बैंकले तोकेको अवधिमा २७ वटा वाणिज्य बैंकले चालू आर्थिक वर्षको वित्तीय विवरण सार्वजनिक गरेका छन् । गत आर्थिक वर्ष समाप्त भएको १ महिना बित्नै लाग्दा पनि राष्ट्रिय वाणिज्य बैंक भने वित्तीय विवरण गर्न सार्वजनिक गर्न पछि परेको हो ।
नेपाल राष्ट्र बैंकले अनिवार्य रुपमा नेपाल फाइनान्सियल रिपोर्टिङ स्टान्डर्ड (एनएफआरएस) अनुरुप वित्तीय विवरण बनाउनुपर्ने भएपछि बैंक तथा वित्तीय संस्थाले गत आर्थिक बर्षको वित्तीय प्रकाशनमा ढिलाई गरेका थिए । राष्ट्र बैंकले उल्लेख गरेको ढाँचामा वित्तीय विवरण सार्वजनिक गर्न ढिलो हुने भएपछि उनीहरुले राष्ट्र बैंकलाई समय थप गर्न अनुरोध गरेका थिए । राष्ट्र बैंकले दिएको थप १५ दिनमा लगभग सबै बैंकको विवरण आएको हो ।
यसअघि मंगलबारसम्म १० वटा वाण्ज्यि बैंकले मात्र विवरण सार्वजनिक गरेकोमा बुधबार १७ वटा थप बैंकले विवरण प्रकाशन गरेका थिए । यसअघि बैंक तथा वित्तीय संस्थाले त्रैमासिक सकिएको १५ दिनभित्र विवरण सार्वजनिक गरिसक्नुपर्ने थियो ।
डेढ अर्ब निक्षेप र सवा अर्ब कर्जासहित एनआईसी एसिया अगाडि, नबिल र इन्भेस्टमेन्ट पछिपछि गत आर्थिक वर्षमा सबैभन्दा धेरै निक्षेप संकलन गर्नेमा एनआईसी एशिया बैंक रहेको छ ।
अघिल्लो आवको अन्त्यसम्म ८६ अर्ब ६९ करोड रुपैयाँ मात्र निक्षेप संकलन गरेको बैंकले एक वर्षमै करिब ६५ अर्ब रुपैयाँ बराबरको निक्षेप संकलन गरेर कूल निक्षेप १ खर्ब ५१ अर्ब २० करोड रुपैयाँ पुर्याएको छ । बैंकले हालसम्म १ खर्ब २० अर्ब ६६ करोड रुपैयाँ बराबरको कर्जा प्रवाह गरेको छ । कर्जा प्रवाह अघिल्लो आवको अन्त्यभन्दा ४८ अर्ब रुपैयाँ बढी हो ।
यससँगै एनआईसी एशिया निजीक्षेत्रको सबैभन्दा ठूलो बैंक बन्न सफल भएको हो ।
वाणिज्य बैंकहरुमा सबैभन्दा धेरै निक्षेप संकलन गर्ने बैंक राष्ट्रिय वाणिज्य बैंक रहेको छ । बैंकले गत चैत मसान्तसम्म नै १ खर्ब ५ अर्ब रुपैयाँको निक्षेप संकलन गरिसकेको थियो । बैंकको चौंथो त्रैमासिक अवधिको विवरण सार्वजनिक हुन बाँकी नै छ ।
निक्षेप संकलन र कर्जा प्रवाहको नेपाल इन्भेस्टमेन्ट र नबिल बैंक क्रमशः दोस्रो र तेस्रो स्थानमा रहेका छन् ।
नाफा गर्नेमा नबिल बैंक अगाडि, ३ बैंकको नाफा अर्बभन्दा कम, ४ को वृद्धिदर ऋणात्मक
गत आवमा सबैभन्दा धेरै खुद मुनाफा नबिल बैंकले गरेको छ ।
बैंकले वर्षभर ४ अर्ब ५ करोड खुद मुनाफा गरेको हो । खुद मुनाफाको आधारमा ३ अर्ब ६७ करोड रुपैयाँ सहित कृषि विकास बैंक रहँदा तेस्रो स्थानमा रहेको नेपाल इन्भेस्टमेन्ट बैंकले ३ अर्ब ५७ करोड नाफा गरेको छ ।
यसअवधिमा ३ अर्बभन्दा बढी नाफा गर्ने ४ वटा वाणिज्य बैंक रहेका छन् भने ३ वटा बैंकले १ अर्ब नाफा पनि कमाएका छैनन् । ती बैंकमा सिभिल बैंक, सेन्चुरी बैंक र जनता बैंक रहेका छन् ।
यसअवधिमा सबैभन्दा बढी नाफा वृद्धि भने सिभिल बैंकले गरेको हो । तर, अघिल्लो वर्षको तुलनामा ४ वटा वाणिज्य बैंकको नाफा भने घटेको छ । नाफा घट्नेमा एनआईसी एशिया, प्रभु बैंक, एनसीसी बैंक र नेपाल बंगलादेश बैंक रहेका छन् ।
कृषि विकास बैंकको चुक्तापुँजी सबैभन्दा धेरै, ४ को अपुग
वित्तीय विवरण सार्वजनिक गर्ने २७ बैंकमध्यै सबैभन्दा धेरै चुक्तापुँजी कृषि विकास बैंकको रहेको छ । बैंकले यसअवधिसम्म १३ अर्ब ९३ करोड रुपैयाँ चुक्तापुँजी कायम गरेको हो । चुक्तापुँजीको हिसाबमा नेपाल इन्भेस्टमेन्ट बैंक दोस्रो स्थानमा रहँदा मेगा बैंक नेपाल तेस्रो स्थानमा उक्लिएको छ ।
वित्तीय विवरण सार्वजनिक गर्ने बैंकमा पहिलोपटक ८ अर्बमाथि चुक्तापुँजी पुर्याउने बैंकमा एभरेस्ट बैंक, सिद्धार्थ बैंक, माछापुच्छ्रे बैंक, नेपाल एसबीआई, प्रभु, सिभिल र प्राइम कमर्सिएल बैंक रहेका छन् । यी सबै बैंकको गत आवसम्म राष्ट्र बैंकको निर्देशन बराबरको चुक्तापुँजी पुगेको थिएन ।
यस अवधिसम्म आइपुग्दा चार वटा वाणिज्य बैंकको चुक्तापुँजी अझै अपुग छ । चुक्तापुँजी अपुग हुने बैंकमा एनएमबी, बैंक अफ काठमाण्डु, कुमारी र एनसीसी बैंक रहेका छन् । तीमध्ये एनसीसीको सबैभन्दा कम ४ अर्ब ६७ करोड रुपैयाँ मात्र चुक्तापुँजी रहेको छ ।
प्रतिसेयर आम्दानीमा नबिल बैंक अब्बल
नबिल बैंकका लगानीकर्ताको गत आव प्रतिसेयर आम्दानी ५० रुपैयाँ ३९ पैसा रहेको छ । यसअवधिमा नेपाल बैंकले प्रतिसेयर ४२.२७ रुपैयाँ तथा कृषि विकास बैंकले ३९.३६ रुर्पैयाँ प्रतिसेयर आम्दानी दिँदा सेन्चुरी बैंक १० रुपैयाँ ८६ प्रसा सहित सबैभन्दा पुछारमा रहेको छ ।
सिभिल बैंक सबैभन्दा कमजोर
गत आवमा निक्षेप संकलन तथा खुल मुनाफाको आधारमा सिभिल बैंक सबैभन्दा कमजोर देखिएको छ । बैंकले गत आवसम्म ४० अर्ब १ करोड रुपैयाँको निक्षेप संकलन गर्दा ३९ अर्ब ४६ करोड रुपैयाँको कर्जा प्रवाह गरेको छ । बैंकले गत आवभर सबैभन्दा बढी नाफमा वृद्धि गरेपनि यो नाफा अन्य वाणिज्य बैंकहरुको तुलनामा सबैभन्दा न्यून हो ।
यद्यपि बैंकको चुक्तापुँजी नेपाल राष्ट्र बैंकले तोकेको न्यूनतम चुक्तापुँजीभन्दा बढी हो ।
नबिल, इन्भेस्टमेन्टसँगै एनआईसी एशिया पनि अब्बल बन्दै
तसर्थ, समग्र वित्तीय विरणको आधारमा सबैभन्दा अब्बल बैंकको शिर्षस्थानमा नेपाल इन्भेस्टमेन्ट बैंक, नबिल बैंक र एनआईसी एशिया बैंक रहेका हुन् ।