ललितपुर । नागपञ्चमीमा एक लाख आन्तरिक पर्यटक नागदह पुगेका छन् । वर्षेनी झण्डै ३० हजार जनाको हाराहारीमा आगन्तुक आउने गरेकामा यस वर्ष महोत्सवको आयोजना गरिएकाले पर्यटकको संख्यामा वृद्धि भएको आयोजकले जनाएको छ ।
संस्कृति, पर्यटन तथा नागरिक उड्डयनमन्त्री रवीन्द्रप्रसाद अधिकारीले नागदहको विकासका लागि सरकारले सहयोग गर्ने प्रतिबद्धता व्यक्त गरे । पर्यटन क्षेत्र र ट्राभल एजेन्सीका बीचमा सहकार्य बढाउनुपर्नेमा उनको जोड छ । उनले भने, “नागदहजस्ता धार्मिक र प्राकृतिक हिसाबले महत्वपूर्ण ठाउँको प्रवद्र्धन गर्दै जानुपर्छ ।” नागदह आसपासका जग्गा व्यवस्थापनको खाँचो उहाँले औँल्याए ।
नेपाल कम्युनिष्ट पार्टी (नेकपा)का स्थायी कमिटी सदस्य पम्फा भुसालले यस क्षेत्रमा रहेका पर्यटकीय क्षेत्रलाई समेटेर ‘पदमार्ग रुट’ बनाउने योजना सुनाए ।
ललितपुर महानगरपालिकाका उपप्रमुख गीता सत्यालले नागदहको विकासका लागि महानगरपालिकाले सहयोग गर्दै जाने बताइन् । नागदह महोत्सव मूल आयोजना समितिका अध्यक्ष दिनेश कार्कीले नागदह केन्द्रित गरेर हाइकिङ रुटको विकास गरिनेमा जोड दिए । रासस
