बीबीसी । विश्वभरीमा अर्काको शुक्राणु खरिद गरेर आमा बनिरहेका महिलाको संख्या विश्वभरी बढ्दै गएको छ । यस्ता महिलाहरु बिबाह नगरेरै ‘आईवीएफ’ को सहायतामा बिना यौन सम्बन्ध आमा बनी रहेका छन् ।
पाली केर पनि त्यस्तै महिलामध्ये एक हुन्, जो अपरिचित पुरुषको शुक्राणु प्रयोग गरेर आमा बनेकी छिन् । अक्सफोर्डकी ३९ वर्षिया पालीले एक अज्ञात शुक्राणुदाता (स्पर्म डोनर) को शुक्राणुबाट गत वर्ष गर्भधारण गरेकी थिइन् । र यो वर्षको शुरुआतमा उनले शिशु जन्माएकी थिइन् ।
यस प्रक्रियामा शुक्राणुलाई प्रयोगशालामा गर्भाधान गरिन्छ । ‘आईवीएफ’ लाई एक–अर्काको कमजोरीका कारण आमा अथवा बुवा बन्न सक्ने सामथ्र्य नभएका दम्पतीहरुले पनि प्रयोग गर्दै आएका छन् ।
पालीले भनिन्, ‘‘म पूर्णतः तयार थिएँ र जान्दथेँ कि यदि म आमा बन्न चाहन्छु भने आईवीएफलाई नै अपनाउनु पर्नेछ । ३६–३७ वर्षकी हुँदा नै मैले यसका बारेमा गम्भीरतापूर्वक सोच्न शुरू गरेकी थिएँ । म कहिल्यै रिलेशनशिपमा रहिन । यस्तो अवस्थामा मैले आईवीएफ नअपनाएको भए कहिल्यै आमा बन्न सक्थिन ।’’
ब्रिटेनमा सरकारी तथ्याङ्कअनुसार एकल महिला बन्ने प्रचलन बढ्दै गएको छ । सन् २०१४ देखि ब्रिटेनमा एकल महिलाको दर ३६ प्रतिशतले बृद्धि भएको छ । अक्सफोर्ड फर्टिलिटीका मेडिकल निर्देशकले २० भन्दा बढी एकल महिलाहरुको उपचार गरिएको बताएका छन् ।
जस्तो–जस्तो जागरूकता बढ्दै जानेछ त्यस्तै–त्यस्तै एकल महिलाको प्रचलनपनि बढ्दै जाने उनको भनाई छ ।
अक्सफोर्ड फर्टिलिटीले मानिसहरुले अब बच्चालाई एक्लै जन्माउन चाहेको जनाएको छ । शिशु जन्माउन मानिसहरु कि त शुक्राणु खरिद गर्छन् भने कि अंडाणु । भारतमा यो चलन हालैका दिनहरुमा देखिन शुरु भएको छ । गतवर्ष बलिउडकर्मी करण जौहर र तुषार कपूरले पनि यो विधि अपनाएका थिए ।
यद्यपि ‘आईवीएफ’ महंगो हुन्छ । ब्रिटेनमा झण्डै सात लाख रुपैयाँसम्म खर्च हुन्छ । ‘आईवीएफ’ सफल रहने नरहने भन्ने कुरा महिलाको अंडाणुमा निर्भर हुन्छ । र साथै शुक्राणुको गुणवत्तामा पनि । अक्सफोर्ड फर्टिलिटीमा ‘आईवीएफ’ को सफलताको दर ३० देखि ५० प्रतिशतको बीचमा छ ।