काठमाडौं । मुलपानी अन्तर्राष्ट्रिय क्रिकेट मैदानको मुआब्जा विवाद सुल्झिएको छ । मैदानको बीचभागमा पर्ने ५२ आना जग्गाको सट्टा जग्गा नै दिने निर्णयभएसँगै विवाद सुल्झिएको हो ।
मन्त्रिपरिषद्को बैठकले मैदानको मुआब्जा विवाद समाधानको लागि जग्गा धनीलाई मुलपानी क्रिकेट मैदानको परिसरमै जग्गा दिने निर्णय गरेपछि विवाद समाधान हुने भएको हो । लामो समयदेखि जग्गा विवाद समाधान नहुँदा निर्माण कार्य रोकिएको थियो ।
मन्त्रिपरिषद् बैठकको निर्णयसँगै मुलपानी अन्तर्राष्ट्रिय क्रिकेट मैदानले अब गति लिने भएको छ । राष्ट्रिय खेलकुद परिषदका सदस्यसचिब केशवकुमार बिष्टका प्रेस सल्लाहकार रोहित दाहालका अनुसार मन्त्रिपरिषद्को बैठकले जग्गाको सट्टा जग्गा नै दिने निर्णय भएको बताए । उनले मैदान परिसरमै रहेको जग्गा जग्गाधनीलाई दिने निर्णय भएको बताए ।
यसअघि जग्गाको विवाद समाधान गर्नका लागि सरकारले तोकिएको मुल्यमा जग्गाधनीले छाड्न मानेका थिएनन् । जग्गाधनीले जग्गा सट्टापट्टाको अडान राखेपछि मैदान निर्माण कार्य रोकिएको थियो ।