काठमाडौं । अखिल नेपाल फुटबल संघ (एन्फा) मा अनियमितता भएको आरोप लगाउँदै त्यसको छानबिन गर्न पूर्व वरिष्ठ उपाध्यक्ष मणि कुँवरले राष्ट्रिय खेलकुद परिषद् (राखेप) र युवा तथा खेलकुद मन्त्रालयमा उजुरी दिएका छन् ।
दक्षिण एसियाली फुटबल महासंघका उपाध्यक्षसमेत रहेका मणि कुँवरले ५ बँुदामा एन्फाले पछिल्लो समयमा गलत गतिविधि गरेको आरोप लगाउँदै त्यसको छानबिन गर्न युवा तथा खेलकुद मन्त्री जगत बहादुर विश्वकर्मा र राखेपका सदस्य सचिव केशव कुमार विष्टलाई पत्र पठाएका छन् ।
पूर्व वरिठ उपाध्यक्ष कुँवरले एन्फामा आएका कर्माछिरिङ शेर्पा नेतृत्वको नयाँ कार्यसमितिले संसारमै नभएको रेलिगेशन विनाको लिग गर्न लागेको बताएका छन् । त्यस्तै, कर्माछिरिङ शेर्पा प्यानललाई चुनावमा सहयोग गरेकै भरमा विदेशी नागरिक नविन पाण्डेलाई फिफा कंग्रेसमा सहभागि गराएको आरोप लगाएका छन् ।
राखेप र मन्त्रालयमा बुझाएको पत्रमा मणिले रसिया विश्वकपका लागि फिफाबाट २५० टिकट ल्याए पनि पारदर्शिता नदेखाएको, एन्फा चुनाव भएको ३ महिना पनि नवित्दै चितवनमा विशेष साधारणसभा गरेर विधान संशोधन गरेको आरोप लगाएका छन् । आफ्नो मनोमानी तरिकाले प्रदेशमा संरचना गर्न खोजेको उनको भनाइ छ ।
गत वैशाखमा एन्फा चुनावबाट ४ वर्षका लागि कर्माछिरिङ शेर्पाको नेतृत्वमा पूरै प्यानल विजयी भएको थियो ।