काठमाडौं । नेपाली अलराउण्डर क्रिकेटर खेलाडी सागर पुनले मलेसियामा जारी मलेसियन प्रिमियर लिग क्रिकेट प्रतियोगितामा शतक प्रहार गरेका छन् । सेमिफाइनल खेलमा क्वालालम्पर क्लबबाट खेलेका सागरले सेलंगोरविरुद्ध शतक प्रहार गरेका हुन् ।
ओपनर सागरले ११८ बलमा १०० रन बनाउँदै आउट भए । उनले ९ चौका प्रहार गरे । सागर पुनले यसअघि लिग चरणको खेलमा पनि सेलंगोरविरुद्ध नै शतक प्रहार गरेका थिए । सागरले १२९ बलमा १२ चौका र २ छक्का प्रहार गर्दै १०९ रन बनाएका थिए ।
मलेसियन प्रिमियर लिग क्रिकेट सागर पुनका लागि निकै फलदायी बनेको छ । सागर यो लिगमा सर्वाधिक रन बनाउने खेलाडीको शीर्ष स्थानमा रहेका छन् । सागरले २ शतकसहित १ खेलमा अर्धशतक पनि बनाएका छन् । यो प्रतियोगितामा अहिलेसम्म सागरले ९ खेलबाट ४४२ रन बनाएका छन् । जसमा ५१ चौका र ८ छक्का प्रहार गरेका छन् । 
सागरले आफ्नो पहिलो खेलमा नै पेनाङविरुद्ध ६६ रन बनाउँदै अर्धशतक प्रहार गरेका थिए । त्यस्तै, सागरले बलिङतर्फ पनि उत्कृष्ट प्रदर्शन गरेका छन् । उनले ९ खेलबाट ९ विकेट लिइसकेका छन् ।