खेल

सीपीएलमा सन्दीपको उत्कृष्ट बलिङ, लिए २ विकेट

सीपीएलमा सन्दीपको उत्कृष्ट बलिङ, लिए २ विकेट

एजेन्सी । नेपाली लेग स्पिनर सन्दीप लामिछानेले क्यारेबियन प्रिमियर लिग (सीपीएल) क्रिकेटमा उत्कृष्ट बलिङ गर्दै २ विकेट लिएका छन् । टिम सेन्ट किट्स एन्ड नेभिस प्याट्रियट्सबाट खेलेका सन्दीपले गुयाना एमेजोन वारियर्सविरुद्ध २ विकेट लिन सफल भएका हुन् ।

आज (शुक्रबार) बिहान भएको खेलमा सन्दीपले सीपीएलमा शानदार बलिङ गरे । आफ्नो पहिलो खेलमै उनले प्रभाव छोड्न सफल भए । ४ ओभर बलिङ गरेका सन्दीपले १२ रन मात्रै खर्चेर २ विकेट लिएका हुन् ।

सन्दीपले आफ्नो पहिलो ओभरमा नै विकेट लिन सफल भएका थिए । उनले १.१ ओभरमा चाडविक वाल्टोनलाई ९ रनमा आउट गराएका थिए । त्यस्तै, उनले जासन मोहम्मदलाई १६ रनमा आउट गराए । 

नेपालका युवा खेलाडी सन्दीपको यो तेस्रो ठूलो अन्तर्राष्ट्रिय लिगमा सहभागिता हो । यसअघि सन्दीपले इन्डियन प्रिमियर लिग (आईपीएल) मा दिल्ली डेयरडेभिल्सबाट खेलेका थिए । उनले दिल्लीबाट ३ खेल खेल्दै ५ विकेट लिएका थिए । त्यस्तै, सन्दीपले ग्लोबल क्यानेडियन लिग क्रिकेटमा पनि खेल्ने अवसर पाएका थिए । एकपछि अर्को लिग तथा प्रतियोगितामा उत्कृष्ट प्रदर्शन गरेका सन्दीप यो सीपीएलमा पनि उत्कृष्ट प्रदर्शन गर्ने लक्ष्यमा छन् ।

तपाईंको मत