Skip Advt.

हाँस्दै गरेका किम जोङको तस्बिर चर्चामा

हाँस्दै गरेका किम जोङको तस्बिर चर्चामा

एजेन्सी । उत्तर कोरियाली शाषक किम जोङ उन केहि समय यतादेखि देशको आर्थिक विकासका निम्ति विभिन्न उद्योगहरुको भ्रमण गर्ने क्रममा छन् र उत्पादनहरुको प्रत्यक्ष निरीक्षण समेत गरिरहेका छन् । यसै क्रममा बुधबार पनि उनी पत्नी रि सोल्जुका साथ खाद्यान्न उद्योग पुगेको तस्बिरहरु राष्ट्रिय संचार केसिएनएले सार्वजनिक गरेको छ । दक्षिणको ह्वाङ्गी प्रदेशमा रहेको सो उद्योगमा तीस भिन्दा भिन्दै किसिमका माछाका परिकारहरु उत्पादन हुने गरेको बताइएको छ । 

तर बुधबारको उनको भ्रमण अरुबेला कै जस्तो देखिएपनि किमको अनौठो हाउभाउ र असाधारण पहिरनका कारण अहिले फेरि सबैको ध्यान उनीतर्फ केन्द्रित भइरहेको छ । क्रुर शाषकका रुपमा चिनिने किम जोङका हालका तस्बिरहरुले उनको छविमा धेरै ठूलो परिवर्तन देखाइरहेको छ । 

बुधबार पनि उनको अलगै रुप देखापरेको हो जहाँ उनी अत्यन्तै खुसी भएर मज्जाले हाँसिरहेका छन् । त्यसकारण पनि यी तस्बिरहरुको धेरै चर्चा भइरहेको छ भने अर्कोतर्फ पश्चिममा चाहिँ यसलाई विवादित ठहर गरिएको छ । अमेरिकी संचार माध्यम फक्स न्युजले सो तस्बिरहरु उनीहरुले केबल आफ्नो देश र शाषक किमको सकारात्मक प्रचारका लागि मात्र बाहिर ल्याइरहेको उल्लेख गरेको छ ।

गत जूनमा राष्ट्रपति डोनाल्ड ट्रम्पसँगको ऐतिहासिक भेटवार्तापछि अझै पनि दुई देशबीच निशस्त्रीकरण र कोरियाली प्रायद्विपमा शान्ति स्थापनाबारे छलफल जारी छ । यसक्रममा अमेरिकी प्रशासनले प्योङयोङलाई हतियार मुक्त बनाउने प्रक्रिया छिटो सुरु गर्न दबाब दिइरहेको छ भने उता उत्तर कोरियाले चाहिँ आफूमाथिको आर्थिक प्रतिबन्ध हटाउन माग गरिरहेको छ । 

उत्तर कोरियाले इमान्दारीपूर्वक कोरियाली युद्धमा ज्यान गुमाएका अमेरिकी सेनाहरुको अवशेष फिर्ता गरेको र प्रमुख परीक्षण स्थलहरु पनि नष्ट गरिसकेको बताउँदै अमेरिकालाई आफ्नो पक्षमा पनि ठोस कदम उठाउन आग्रह गरिरहेको छ । यसकारण पनि यी तस्बिरमा किमको अनौठो अवतार अमेरिका सामु राम्रो प्रभाव पार्ने उद्देश्यले सार्वजानिक गरिएको हुन सक्ने शंका गरिएको छ । तर उता संयुक्त राष्ट्र संघले भने अझै उत्तर कोरिया आणविक कार्यक्रममा आबद्ध रहेको दाबी गरिरहेको छ । यस्तोमा किमको तस्बिरले विभिन्न ढङ्गमा चर्चाका साथै आलोचना पनि खेप्नु परिरहेको अन्तराष्ट्रिय संचार माध्यमको भनाइ छ ।

गत वर्ष मात्र संयुक्त राष्ट्र संघले उत्तर कोरियामा ७० प्रतिशत जनता भोकमरीको अवस्थामा रहेको खुलासा गरेको थियो । यस्तोमा चौतर्फी प्रतिबन्धका कारण प्योङयोङको आर्थिक स्थिति दिन प्रति दिन कमजोर बन्दै गइरहेको छ । त्यसैगरी  मंगलबार मात्र राष्ट्रिय सुरक्षा सल्लाहकार जोन बोल्टनले प्योङयोङ आफ्नो वचनबाट पछि हटिरहेको उल्लेख गरेका हुन् । तर देश सम्बन्धी यस्ता खबरका बावजुद बुधबारको भ्रमणमा किम चिन्तामुक्त अवस्थामा खुलेर हाँसिरहेको देखा परेका हुन् । त्यस्तै अर्कोतर्फ देशभरको तापक्रम पनि उत्तिकै वृद्धि भइरहेकाले जनताले जिविको पार्जनका लागि थप चुनौतिको सामना गर्नु परिरहेको पनि बताइएको छ । तर किमका यी तस्बिरले भने उत्तर कोरियामा प्रतिबन्धको कुनै असर नपारेको संकेत दिन खोजिरहेको बताइएको छ । 
 

प्रतिकृया दिनुहोस