काठमाडौं । राष्ट्रिय युवा नेतृत्व अध्ययन कार्यक्रम २०१८ को तेस्रो कार्यक्रम कास्कीको चिसापानीमा सम्पन्न भएको छ । काठमाडौंस्थित लीडरशिप एकेडेमी र अमेरिकास्थित युनिभर्सिटी अफ सान डिएगो , क्रक स्कुल र क्रक इन्स्टिच्युट फर पिस एण्ड जस्टिसको संयुक्त आयोजनामा सञ्चालित एक वर्षे यस कार्यक्रममा देशभरका विभिन्न राजनीतिक पार्टी, अधिकारकर्मी, विभिन्न संघसंस्थाका प्रतिनिधि गरी २१ जना सहभागी छन् ।
यस कार्यक्रमको सुरुवात राजधानी काठमाडौंमा भएको थियो भने दोस्रो कार्यक्रम दोलखामा भएको थियो । चौथो कार्यक्रम तथा समापन कात्तिकमा जनकपुरमा हुने बताइएको छ । कार्यक्रमका सहभागीहरुलाई नेतृत्व विकास, द्वन्द्व व्यवस्थापन, प्रोजेक्ट म्यानेजमेन्टलगायत विषयमा प्रशिक्षण दिइन्छ ।
तेस्रो कार्यक्रममा सहभागी विभिन्न भौगोलिक क्षेत्रका सहभागीहरुले आ–आफ्नो क्षेत्रका सम्भावना र चुनौतीहरुका बारेमा औंल्याउँदै कार्यक्रमका दौरान फरक क्षेत्रमा पुग्दाको अनुभव सुनाएका थिए । रुपन्देहीबाट सहभागी भएकी सरिता श्रीषले तराई क्षेत्रका कृषिको अपार सम्भावना रहेको बताउँदै तराई क्षेत्रमा उत्पादन बढाउन सके पूरै देशको खाद्य संकट कम गर्न सहयोग पुग्ने धारणा राखिन् ।
प्रदेश नम्बर २ बाट सहभागी कञ्चना झाले भौगोलिक क्षेत्रअनुसार व्यापार व्यवसायको सम्भावना हुने बताउँदै तराई क्षेत्रमा मिथिला कलाको सम्भावना रहेको बताइन् ।
पर्वतबाट सहभागी पदमपाणि शर्माले युवालाई विदेश पलायनबाट रोक्न व्यावसायिक शिक्षामा जोड दिनुपर्ने बताए । काठमाडौंबाट सहभागी रमा भट्टराईले राष्ट्रिय सुरक्षा, एकता र शान्तिको लागि सबै नेपाली एकजुट हुनुपर्नेमा जोड दिइन् ।
कास्कीको चिसापानीमा रहेको फ्याब भोकेसनल स्कुलमा आयोजित तेस्रो कार्यक्रममा युनिभर्सिटी अफ सान डिएगो क्रक स्कुल र क्रक इन्स्टिच्युट फर पिस एण्ड जस्टिसका कार्यक्रम अधिकृत डेनियल ओर्थ, नेपाल प्रहरीका पूर्व आईजीपी ध्रुवबहादुर प्रधान, नेपाली राष्ट्रिय क्रिकेट टिमका पूर्वकप्तान विनोद दासलगायतले सहभागीहरुलाई प्रशिक्षण दिएका थिए ।
नेपालका युवा नेतृत्वलाई अझै प्रभावकारी बनाउन र उनीहरुमा विकसित भइरहेको नेतृत्व क्षमताको विकास, विस्तार र अभिवृद्धिका लागि यो कार्यक्रम सञ्चालनमा ल्याइएको लिडरसिप एकेडेमीले जनाएको छ । यस प्रशिक्षणात्मक कार्यक्रमले युवा नेतृत्वको अग्रसरतामा गाउँ तथा समाज परिवर्तनका लागि भइरहेका प्रयासहरुलाई प्रभावकारी रुपमा सञ्चालन गर्न तथा समुदायमा यी कार्यक्रमको ठूलो प्रभाव सिर्जना गर्न मद्दत गर्ने आयोजकको दाबी छ । कार्यक्रमले समुदाय तथा सरकारी निकायसँग अझै प्रभावकारी रुपमा काम गर्नका लागि युवा नेतृत्वलाई मिडियासँग संलग्नता, सामुदायिक समस्याहरुको वकालत, तथा सम्बोधनजस्ता विविध विषयमा तालिम प्रदान गर्छ ।
आईपीजले नेपालको द्वन्द्व व्यवस्थापनका लागि नेपालका राजनीतिक दल, नागरिक समाज र महिला नेतृहरुसँग मिलेर सन् २००२ देखि काम गर्दै आएको छ ।
लिडरसिप एकेडेमी काठमाडौंमा रहेको गैरनाफामूलक शैक्षिक संस्था हो । यसले राष्ट्रिय–अन्तर्राष्ट्रिय स्तरमा वैकल्पिक शैक्षिक पाठ्यक्रम निर्माण गरी विभिन्न कार्यक्रमहरु सञ्चालन गरिरहेको छ ।