काठमाडौं । नेपालले त्रिकोणात्मक टि–ट्वान्टी क्रिकेट सिरिजअन्तर्गत मेलर्बोन क्रिकेट क्लब (एमसीसी) लाई पराजित गरेको छ । नेपालले एमसीसीलाई ९ विकेटले पराजित गरेको हो ।
इंग्ल्यान्डको लर्ड्समा भएको खेलमा नेपालले एमसीसीलाई सहज रुपमा पराजित गरेको हो । ६ ओभरमा छोट्याइएको खेलमा ४१ रनको चुनौति पछ्याउँदै ब्याटिङ गरेको नेपालले ४.४ ओभरमा १ विकेटको क्षतिमा लक्ष्य पूरा गर्यो ।
नेपालका लागि सुवास खकुरेलले अविजित १६ र ज्ञानेन्द्र मल्लले अविजित १२ रन बनाए । सुवासले १५ बलको सामना गर्दै २ चौका प्रहार गरेर उक्त रन बनाएभने ज्ञानेन्द्रले ४ बलमा १२ रन बनाए । उनले १ चौका र १ छक्का प्रहार गरे ।
यसअघि टस हारेर पहिले ब्याटिङ गरेको एमसीसीले ६ ओभरमा छोट्याइएको खेलमा ४ विकेटको क्षतिमा ४० रन बनाएको थियो । नेपालले सुरुवाती ओभरमा नै उत्कृष्ट प्रदर्शन गर्दै २ विकेट लिन सफल भएको थियो । नेपालका लागि ओपनर बलर सोमपाल कामीले पहिलो ओभरमा १ विकेट लिए भने एमसीसीका जोनाथन ट्रोट रन आउट हुन पुगेका थिए ।
एमसीसीका लागि कप्तान तथा चर्चित श्रीलंकाली खेलाडी महेला जयवर्दनेले अविजित २४ रन बनाए । एमसीसीका अन्य कुनै खेलाडीले राम्रो रन बनाउन सकेनन् ।
नेपालका लागि सोमपाल कामीले २ विकेट लिए । उनले २ ओभर बलिङ गर्दै ८ रन खर्चेर २ विकेट लिए । त्यस्तै, नेपालका लागि शक्ति गौचनले १ विकेट लिए ।