काठमाडौं । कर्णाली स्वास्थ्य विज्ञान प्रतिष्ठान जुम्लामा प्रहरीले नै हानेको गोली लागेर प्रहरी जवान कमल आचार्य घाइते भएका छन् ।
प्रहरीले आन्दोलनकारीले सिसा र किला प्रहार गर्दा छातीमा लागेर घाइते भएको बताए पनि उपचारमा संलग्न चिकित्सकका अनुसार उनको बायाँ छातीमा गोली लागेको छ ।
उनको बायाँ छातीमा लागेको गोलीको असर मुटु नजिकैसम्म पुगेको उपचारमा संलग्न एक चिकित्सकले बाह्रखरीसँग बताए ।
जुम्लाबाट उनलाई थप उपचारका लागि काठमाडौं ल्याइँदैछ । उनको अहिले नेपालगन्ज मेडिकल कलेजमा भेन्टिलेटरमा राखेर उपचार गरिँदैछ । उनलाई ‘हेमोथोराक्स’ भएको छ । छातीमा रगत जमेका कारण चेस्टट्युव राखेर जमेको रगत निकाल्ने प्रयास हुँदैछ ।
चिकित्सा शिक्षा सुधारको माग राखेर २० दिनदेखि जुम्लास्थित कर्णाली स्वास्थ्य विज्ञान प्रतिष्ठानमा आमरण अनशनमा बसेका डा. गोविन्द केसीलाई प्रहरीले जबरजस्ती काठमाडौं ल्याउन लागेपछि स्थानीय, विद्यार्थी र केसी समर्थकले नारावाजी गरेका थिए । सो क्रममा प्रहरीले अस्पताल परिसरभित्रै गोली चलाएको थियो ।
अस्पताल परिसरभित्रै गोली चलेको विषयले अन्तर्राष्ट्रिय स्तरमा समेत व्यापक विरोध हुन सक्ने भएकाले प्रहरीले यो घटनालाई मोड्न खोजेको हुन सक्ने आचार्यको उपचारमा संलग्न भएका एक चिकित्सकले बताए । यसअघि प्रहरी प्रवक्ता शैलेन्द्र थापाले बाह्रखरीसँग कुरा गर्दै प्रदर्शनकारीको आक्रमणबाट प्रहरी जवान घाइते भएको बताएका थिए ।