काठमाडौं । नेपाली राष्ट्रिय टोलीका सदस्य शक्तिप्रसाद गौचनले आफ्नो क्रिकेट जीवनबाट सन्यास लिने घोषणा गरेका छन् । आज काठमाडौंमा आयोजित एक कार्यक्रमा उनले यस्तो घोषणा गरेका हुन् । कहिलेदेखि  खेल जीवनबाट सन्यास लिने भनेर चाहिँ उनले खुलाएका छैनन् ।

इंग्ल्यान्डको लर्डसमा हुन लागेको टि—२० क्रिकेट सिरिज र नेदरल्यान्ड्ससँग हुन लागेको एक दिवसीय क्रिकेटका लागि जान लागेका शक्तिले नेपालमा हुने कुनै एउटा अन्तराष्ट्रिय फ्रेन्डसिप म्याच खेलेपछि सन्यास लिने बताए ।

विश्वस्तरीय खेलाडी
हसिलो अनुहार, हलुका ज्यान । लगातार १६ वर्ष राष्ट्रिय क्रिकेट टोलीका नियमित सदस्य । सन् २०१४ मा बंगलादेशमा भएको आइसीसी टि–ट्वान्टी विश्वकप क्रिकेटमा हङकङविरुद्ध सानदार ३ विकेट लिएपछि ‘कमेन्ट्री’ बक्सबाट पाकिस्तानका पूर्व क्रिकेटर रमिज राजाले भनेका थिए– शक्ति ‘द पावर’ । त्यसपछि त्यही नामबाट चर्चित बने शक्ति ।

विश्वकपको मैदानमा गुञ्जियो शक्तिको नाम । शक्तिलाई बाबु, शक्ति ‘द पावर, धोचू, हुटियालगायतका उपनामले पनि चिनिन्छ । १६ मार्च २०१४ मा हङकङविरुद्धको खेलबाट अन्तर्राष्ट्रिय टि–ट्वान्टी विश्वकप क्रिकेटमा डेब्यु गरेका शक्तिले त्यो खेलमा ४ ओभरमा ९ रन खर्चेर महत्वपूर्ण ३ विकेट लिएका थिए । त्यो खेलमा शक्ति ‘म्यान अफ दि म्याच’ घोषित भएका थिए । 

नेपाली राष्ट्रिय क्रिकेट टोलीका भेट्रान ‘अर्थोडक्स’ स्पीनर हुन् शक्तिप्रसाद गौचन । २२ अप्रिल १९८४ मा रुपन्देहीमा जन्मिएका शक्तिले आज अन्तर्राष्ट्रिय क्रिकेटबाट सन्यास लिने घोषणा गरेका छन् । यु–१७ हुँदै १९ वर्षमुनिको टोलीबाट राष्ट्रिय टोलीमा प्रवेश गरेका गौचन नेपाली टिमका भरपर्दा बलर हुन् । 

विभिन्न कठिन मोडमा शक्तिले राष्ट्रिय टोलीलाई आफ्नो स्पीनको जादूमयी बलिङबाट जित दिलाएका छन् । ९ ओटा अन्तर्राष्ट्रिय टि–ट्वान्टी क्रिकेटमा शक्तिले ५ दशमलव ६३ को इकोनोमीमा ८ विकेट लिएका छन् । चारओटा प्रथम श्रेणीका खेल खेलेका शक्तिले ६ इनिङमा एक सय ७१ रन बनाएका छन् भने ७१ उच्चतम स्कोर छ उनको । जसमा दुई अर्धशतक पनि समावेश छन् । राष्ट्रिय टोलीबाट शक्तिले शतक पनि प्रहार गरेका छन् । यस्तै, लिष्ट ए का २३ खेलमा ३ दशमलव ८५ को इकोनोमीमा १८ विकेट शक्तिले लिएका छन् ।

त्यसैले उनलाई कम रन दिने ‘कन्जुस’ बलरको नामले पनि चिनिन्छ । विभिन्न कठिन समयमा शक्तिले आफ्नो ब्याटिङबाट पनि टोलीलाई उकासेका छन् । यसअघि इन्डियन प्रिमीयर लिग (आईपीएल)मा राजस्थान रोेयल्समा शक्ति ट्रायल दिन गएपछि उनको चर्चा थप चुलिएको थियो । सन् २००१ मा नेपालको यू– १७ राष्ट्रिय टोलीबाट अन्तर्राष्ट्रिय क्रिकेट खेल्न थालेका शक्तिले यू–१९ को विश्वकप टोलीमा नेपालको तर्फबाट प्रतिनिधित्व गरेका थिए । शक्ति आफ्नो अन्तर्राष्ट्रिय खेल जीवनमा १० पटक म्यान अफ दि सिरिज घोषित भएका छन् ।

२०१० को एसियन गेम्सपछि झण्डै डेढ वर्ष शक्ति राष्ट्रिय टोलीमा परेनन् । तर, त्यसपछिको पुनरागमन शानदार रह्यो । २०१२ मा भएको आईसिसी ट्वान्टी–ट्वान्टी विश्वकप छनोटमा १६ विकेट लिएर प्रतियोगिताकै सर्वाधिक विकेट लिने खेलाडीको सूचीमा दोस्रो नम्बरमा परे । छनोटमा शक्तिले डेनमार्कविरुद्धको खेलमा लगातार तीन विकेट लिएर ह्याट्रिकसमेत गरे । राष्ट्रिय सिनियर टोलीबाट नेपाली खेलाडीको त्योे पहिलो ह्याट्रिक थियो । सन् २०१२ मै भएको एसिसी ट्रफीमा उनले १५ विकेट लिँदा डिभिजन चारमा १० विकेट हात लिन सफल भए । 

डिभिजन चारअन्तर्गत मेलेसियाविरुद्धको खेलमा १० ओभरमा ८ मेडन राख्दै दुई रनमा तीन विकेट लिएर शक्तिले आफ्नो नाममा कीर्तिमान पनि कायम गराएका छन् । क्रिकेटप्रति शक्तिको समर्पण र लगाव कहिल्यै कम भएन । जबजब टोली संकटमा हुन्थ्यो, तब संकटमोचकको भूमिका निभाउँथे शक्ति । नेपाली राष्ट्रिय टोलीमा शक्ति र बसन्त रेग्मीको जोडी थियो ।

एसोसिएएट क्रिकेटमा शक्ति चलाख, भरपर्दा र विश्वस्तरीय स्पीनर हुन् । बायाँ हातले बलिङ गर्ने शक्ति दायाँहाते व्याट्सम्यान हुन् । नेपाली क्रिकेटका लागि शक्ति एक अथक योद्धा हुन्, जो कहिल्यै थाकेनन् । नेपालले ४ वर्षका लागि एकदिवसीय मान्यता पाएपछि भेट्रान खेलाडी शक्तिले अन्तर्राष्ट्रिय क्रिकेटलाई अलविदा गर्ने निधो गरेका छन् ।

आसन्न नेदरल्याण्डस्सँगको अन्तर्राष्ट्रिय टि–टवान्टी र वानडे नै नेपाली राष्ट्रिय टोलीको जर्सीमा खेलिने अन्तिम तर ऐतिहासिक श्रृङ्खला हुनेछ । शक्तिले भैरहवामा आफैंले क्रिकेट एकेडेमी पनि खोलेका छन् ।