एजेन्सी । आइतबार रसियामा विश्वकप फुटबल २०१८ सम्पन्न भएसँगै विश्वकप २०२२ को आयोजकको भूमिका रसियाबाट कतारलाई हस्तान्तरण गरिएको छ । रसियाका राष्ट्रपति भ्लादिमीर पुटिन र फिफाका अध्यक्ष गियनी इन्फान्टिनोले कतारका अमिर तमिन बिन हामिद अल थानीलाई विश्वकप आयोजनाको जिम्मा पाएको कतारलाई भूमिका हस्तान्तरण गरेका हुन् ।
तीनैजना उपस्थित रहेको जियोथ्रिभिस्काइ हलमा ग्रान्ड कर्मालिङमा भएको भेटमा आयोजक राष्ट्रको स्वामित्व हस्तान्तरण गरिएको हो । उनीहरुले फिफा विश्वकप २०१८ को नकआउट चरणमा खेलिएको बल ०२२ को आयोजक कतारका प्रतिनिधिलाई हस्तान्तरण गरेका छन् ।
रसियाका राष्ट्रपति पुटिनले पोडियमबाट समातेर सो बल कतारका प्रतिनिधिलाई दिएका थिए । रसिया विश्वकपमा गयराति फ्रान्सले क्रोएसियालाई ४—२ गोल अन्तरले पराजित गरेसँगै चार वर्षका लागि विश्वकप अन्त्य भएको छ । अब सन् २०२२ को विश्वकप कतारमा नोभेम्बर २१ देखि डिसेम्बर १८ सम्म सञ्चालन हुनेछ । पहिलो पटक कतारको मौसमलाई मध्यनजर गर्दै विश्वकपको खेल समय सारिएको छ । सधै समरमा हुनेगरेको विश्वकप पहिलो पटक विन्टर सिजनमा हुने भएको छ ।
रसियाका राष्ट्रपति भ्लादिमीर पुटिनले कतारसँग आफ्नो आयोजनामा सम्पन्न भएको विश्वकपको अनुभव सेयर गरेर कतारलाई सहयोग गर्ने प्रतिक्रिया दिएका छन् । त्यस्तै, फिफा अध्यक्ष गियनी इन्फान्टिनोले भने, ‘फुटबल प्यासन , इमोशन, माया, परिवार र एकताको सम्मीश्रण हो । हामीले रसिया विश्वकपको राम्रो अनुभव लियौं र अब हामीले आयोजना कतारलाई हस्तान्तरण गरेका छौं । म विश्वस्त छु कि ४ वर्षपछि कतारमा पनि यस्तै उर्जा देख्नेछु र यस्तै सकारात्मक प्रभाव जुन रसियामा पाइयो ।’
विश्वकपको मशाल बुझ्दै कतारका अमिर तमिन बिन हमद अल थानीले भनेका छन्, ‘रसियाले सफल विश्वकप आयोजना गरेकोमा बधाई छ । आशा छ हामीले पनि सफल आयोजना गर्न सक्नेछौं ।’