काठमाडौं । एलाइन्स फर द गोविन्द केसीले प्रधानमन्त्री केपी शर्मा ओलीलाई चरेसको थालमा एक किलो मार्सी चामल उपहारस्वरुप दिएको छ ।
व्यापारी दुर्गा प्रसाईँको घरमा मार्सी चामलको भात खाएर व्यापारीमुखी ऐन ल्याएको भन्दै विरोधस्वरुप चरेसको थालमा मार्सी धानको चामल बुझाउन बालुवाटार गएका थिए । जुम्लाकै मार्सी चामल खाएको भए पनि जुम्लामा मेडिकल कलेज खोल्न आनाकानी गरेको भन्दै एलाइन्स फर गोविन्द केसीसम्वद्ध प्ले कार्ड बोकेर बालुवाटार पुगेका थिए ।
विवेकशील साझालगायतका केही पार्टीका प्रतिनिधिसहित प्रधानमन्त्री निवास बालुवाटार पुगेर एलाइन्स फर गोविन्द केसी अभियानले चरेसको थालमा एक किलो मार्सी चामल दिएको हो । चिकित्सा क्षेत्रको सुधारका लागि डा. गोविन्द केसीको सत्याग्रह र आफ्नो छोराको हत्याराका आरोपीलाई कारवाहीका लागि गंगामाया अधिकारीले गरिरहेको सत्याग्रहप्रति वर्तमान सरकार असंवेदनशील र अनुदार देखिएको भन्दै विरोधस्वरुप मार्सी चामल दिइएको हो । तर प्रधानमन्त्री कार्यालयका प्रतिनिधिले उक्त थाल र चामल भने नबुझेको सहभागीहरुले बताएका छन् ।
सोलिडारिटी फर गोविन्द केसीले शनिबार माइतीघर मण्डलामा पनि विरोध कार्यक्रम तय गरेको छ ।
