काठमाडौं । प्रधानमन्त्री केपी शर्मा ओलीले नेपाल चीन सम्बन्धलाई अझ व्यापक बनाउनुपर्ने बताएका छन् । चीन सरकारलाई नेपालको तर्फबाट  एकजोडी गैंडा हस्तान्तरण गर्दै प्रधानमन्त्री ओलीले बिहीबार यस्तो बताएका हुन् । प्रधानमन्त्री ओलीले दुईदेश बीचको परम्परागत सम्बन्धलाई गैंडा उपहारले थप मजबुद बनाएको बताए । भृकुटी र अरनिकोबाट सुरु भएको नेपाल चीन सम्बन्धलाई भद्र र रुप्सीले थप गाढा बनाएको प्रधानमन्त्री ओलीले बताए ।

प्रधानमन्त्री ओलीले नेपालका लागि चीनका राजदुत यु होङलाई प्रकृति संरक्षण कोष खुमलटारमा भद्र र रुप्सी नामका गैंडाको जोडी हस्तान्तरण गरे ।  हस्तान्तरणपछि प्रधानमन्त्री ओलीले भने, “भद्र र रुपसी चीनमा आफ्नै घर जस्तो गरी स्वास्थ्य ढंगले हुर्किनेछन् । सन्तान वृद्धि गर्नेछन् ।”

वन्यजन्तुको संरक्षणका लागि सरकार संवेदनशील रहेको प्रधानमन्त्री ओलीले बताए । “वन्यजन्तु र प्रकृतिको संरक्षणका लागि हामीले पूर्व देखि पश्चिमसम्मका विभिन्न ठाउँमा आरक्षण र संरक्षण क्षेत्र बनाएका छौं,” प्रधानमन्त्री ओलीले भने ।

प्रधानमन्त्री ओलीले नेपाल वन्यजन्तु र चराचुरुंगीका लागि विशेष क्षेत्र भएको बताए । साइवेरियादेखि श्रीलंकासम्मका चरा नेपालमा प्रजनन्का लागि आउनु त्यसैको एउटा नमुना भएको प्रधानमन्त्री ओलीले बताएको उनको सचिवालयले जनाएको छ । दुईवर्ष भन्दा कम उमेरका भद्र र रुपसी चितवन राष्ट्रिय निकुञ्जबाट ल्याइएको हो ।  

तस्बिर सौजन्यः प्रधानमन्त्रीको सचिवालय