एजेन्सी । रसियामा जारी विश्वकप फुटबलअन्तर्गत समूह ‘ए’ मा उरुग्वे र रसियाबीचको खेल सुरु भएको छ । आयोजक राष्ट्र रसिया र उरुग्वे यसअघि नै नकआउट चरण प्रवेश गरिसकेको भएपनि यो खेलले समूह विजेता तथा उपविजेताको टुंगो लाग्नेछ ।
समरा एरिनामा जारी खेलमा दुबै टिम जितको खोजीमा छन् । समूह चरणको अन्तिम खेल खेल्न लागेका रसिया र उरुग्वेले समान २—२ खेल खेलिसकेका छन् ।
दुई खेलमध्ये उरुग्वे र रसिया दुवैले दुवै खेलमा विजयी भएका छन् । उरुग्वेले यसअघि समूह चरणको पहिलो खेलमा इजिप्टलाई १—० गोलले पराजित गरेको थियो । दोस्रो खेलमा उरुग्वेले साउदी अरबलाई पनि १—० गोलले पराजित गरेको थियो ।
यता, रसिया दुवै खेलमा फराकिलो गोल अन्तरले जित निकालेको थियो । रसियाले पहिलो खेलमा साउदी अरबलाई ५—० गोलले पराजित गरेको थियो । रसियाले आफ्नो दोस्रो खेलमा इजिप्टलाई ३–१ गोलअन्तरले पराजित गरेको थियो ।
यो समूहको विजेताले समूह बी को उपविजेतासँग प्रिक्वाटरफाइनलमा खेल्नेछ । त्यस्तै, यो समूहको उपविजेताले समूह बी को विजेतासँग प्रतिस्पर्धा गर्नेछ ।
त्यस्तै, ए समूहकै अर्को खेलमा इजिप्ट र साउदी अरबबीचको खेल पनि जारी छ । यसअघि नै विश्वकपबाट बाहिरिएका राष्ट्र इजिप्ट र साउदी अरबले आफ्नो अन्तिम खेल खेल्न लागेका हुन् ।