काठमाडौं । काठमाडौं उपत्यका सार्वजनिक पुस्तकालयले हरेक महिनाको पहिलो विहिबार आयोजना गर्दै आएको सिर्जना सम्वादमा यस पटक कथाकार जलेश्वरी श्रेष्ठको नविनतम कथा संग्रह ‘म्यारिज एनिभर्सरी तथा अन्य कथा’ माथि अन्तरक्रिया सम्पन्न भयो ।
कार्यक्रमको प्रारम्भमा कथाकार रोशन थापा निरवले संग्रहका कथाहरुमाथि समीक्षात्मक मन्तव्य दिएका थिए । उनले लिखितरुपमा प्रस्तुत गरेको समीक्षा मन्तव्यमा संग्रहको पुरा चिरफार गर्दै जलेश्वरीका कथाहरुमा नारीका कथा र नियती बढी प्रस्तुत भएको बताए ।
कथाकार मधुवन पौडेलले उनका कथा मार्मिक र यथार्थ चित्रण रहेको बताए । कार्यक्रममा प्राडा सनतकुमार वस्तीले श्रेष्ठको संग्रहको एउटा कथा वाचन गरेका थिए ।
कार्यक्रममा प्रा. मोहनराज शर्माले जलेश्वरीको कथाकारिताको चर्चा गर्दै कुनै पनि कथामा घटना र पात्र अब्बल हुनुपर्ने कुरा उठाए । उनले कुनै पनि कथालाई पात्रले कालान्तरसम्म चिनाउने भएको उल्लेख गर्दै रामायण र महाभारतका पात्रहरु आजपनि सबैले स्मरण गर्ने तर अरु आख्यानका पात्रहरु किन कसैको स्मरणमा रहँदैन भन्ने प्रश्न गरे । उनले यो उदाहरण दिँदै कथा र उपन्यासमा पात्रको महत्व बढिहुने बताए ।
कथाकार जलेश्वरी श्रेष्ठले अन्तरक्रियाका क्रममा उठेका प्रश्नहरुको जवाफ दिएकी थिइन । तिर्थराज वन्तको सभापतित्वमा सम्पन्न सो कार्यक्रममा निशा केसी, ज्ञानुवाकर पौडेल, ढकाल राधेश्याम, रमेशानन्द बैद्य, निराजन तिमिल्सिना लगायतले बोलेका थिए ।
