हेटौंडा । नेपाली कांग्रेसका वरिष्ठ नेता रामचन्द्र पौडेलले कांग्रेसलाई नयाँ जीवन प्रदान गर्न मेची–महाकाली अभियान सञ्चालन गर्ने प्रतिज्ञा गरेका छन् । मकवानपुरको हेटौडामा सम्पन्न कांग्रेसका जिल्ला सभापतिहरुको राष्टिय भेलाको समापन समारोहमा वरिष्ठ नेता पौडेलले कांग्रेसलाई नयाँ जीवन प्रदान गर्न मेची–महाकाली अभियान सञ्चालन गर्ने प्रतिज्ञा गरेका हुन् ।

पार्टीलाई सजग गराउन थालिने अभियानका क्रममा सवैलाई समेटेर जाने र कसैको पनि टिप्पणी नगरेर जिल्ला जिल्ला पुग्ने उनको भनाई थियो । “कांग्रेसलाई सजग गर्ने, नयाँ जीवन दिने एउटा अभियान लिएर म मेची महाकालीका सवै ठाउँमा जान्छु । र म कुनै साथीको टिप्पणी नगरीकन पोजेटिभ ढंगबाट पार्टीलाई सशक्त बनाउने कुरा मात्रै गरेर अगाडि बढ्छु,” नेता पौडेलले भने ।

उनले पार्टीमा देखिएका तिक्तताहरु छोडेर एकतावद्ध भएर अगाडि बढ्ने प्रयास गर्नु पर्ने आवश्यकता औंल्याए । आफू सदैव एकताको पक्षपाती रहेको जिकिर गर्दै आफू कुनै पनि गुटवन्दीमा नगालेको दावी गरे । “मेरो अहिले पनि कुनै गुट छैन् । मैले त दृष्टि नपुगेकाहरुको आवाजलाई मैले कहिलेकाँही सहयोग गरिदिन्छु,” पौडेलले भने ।

पार्टी सभापति शेरबहादुर देउवाले सवैलाई समान व्यवहार नगर्दा हेपाईमा परेकाहरुसँग आफू उभिएको उनको आशय थियो । पार्टीलाई मिलाएर लैजानुको विकल्प नभएको दोहोर्याउँदै वरिष्ठ नेता पौडेलले आपसमा नमिलेका कुराहरु एकआपसमा बसेर मिलाउन सकिने पनि प्रष्ट पारे ।