हेटौंडा । नेपाली कांग्रेसका सभापति शेरबहादुर देउवाले पार्टीलाई अन्तरघातमुक्त पार्टी बनाए आगामी निर्वाचनमा राम्रो मत प्राप्त हुने बताएका छन् ।
मकवानपुरको हेटौँडामा चार दिनसम्म चलेको जिल्ला सभापतिहरुको राष्ट्रिय भेलाको समापन समारोहमा सभापति देउवाले आगामी निर्वाचनमा कांग्रेसलाई पहिलो पार्टी बनाउन अन्तरघातमुक्त पार्टी बनाउनुपर्नेमा जोड दिए ।
“अन्तरघातबाट मुक्त पार्टी बनायौं भने आगामी चुनावमा पार्टीले राम्रै मत ल्याउँछ,” उनले भने, “तर त्यसका लागि पार्टी एक हुन जरुरी छ । पार्टी एक हुनका लागि हामी सवै एक भएर लाग्नु पर्दछ ।”
सभापति देउवाले अन्तरघात गर्नेलाई पार्टीमा बस्ने कुनै नैतिक आधार नभएको पनि बताए ।
स्थानीय निर्वाचन र प्रदेशसभामा हस्तक्षेप नगरिएका कारण ठूलो भूल भएको उनको भनाई थियो । स्थानीय चुनावमा जिल्ला सभापतिहरुलाई टिकट वितरण गर्ने अधिकार प्रत्याभूत गरेको भए पनि आफूमाथि ठूलो दवाव आएको स्मरण गर्दै उनले तत्कालिन समयमा हस्तक्षेप नगरेर गल्ती गरेको गरेको बताए ।
“स्थानीय तहको चुनावमा जिल्लालाई टिकट वितरण गर्ने अधिकार दिने निर्णय भएको तर मलाई ठूलो दबाब आयो,” सभापति देउवाले भने, “त्यस्तै प्रदेशमा जित्छु जित्छु भने, टिकट दिएँ तर चुनाव हारे । यी दुई कुरामा हस्तक्षेप नगरेर ठूलो गल्ती गरे ।”
उनले अहिले वडादेखि केन्द्रसम्म पार्टीभित्र र बाहिर ठूलो चुनौती थपिएको जिकिर गर्दै चुनौतीको सामना गर्न आपसी मतभेद हटाएर एकतावद्ध ढंगले अघि बढ्नुपर्ने आवश्यकता औंल्याए । “वडादेखि केन्द्रसम्म ठूलो चुनौती छ । चुनौती छ भनेर भाग्नु हुँदैन । सामना गर्नुपर्छ, सामनाका लागि मतभेद हटाएर एक हुन जरुरी छ,” देउवाले भने ।
आफूमाथि लाग्दै आएको प्रधानन्यायाधिशमाथिको महाअभियोग प्रकरण र त्यसका कारण पार्टीले चुनाव हार्नुपरेको भन्ने आरोपप्रति आपत्ति जनाउँदै उनले हारको कारण दुई कम्युनिष्टबीचको तालमेल र आन्तरिक मतभेद नै भएको दोहोर्याए । तत्कालिन गृहसचिव र तत्कालिन प्रहरी महानिरीक्षकले नवराज सिलवाल ‘फ्रड’ भएको रिपोर्टिङ गरेको र प्रधानन्यायाधीशले सिलवाल सही भएको बताएपछि सिर्जना भएको अवस्थाका कारण महाअभियोग लगाइएको देउवाले स्पष्टिकरण दिए ।
“एउटै मान्छेको दुईवटा कार्य सम्पादन मूल्यांकन आयो । त्यसमा सिग्नेचर गर्नेलाई बोलाएर के हो यो भनेर सोध्दा उसले जाली हो भन्यो,” देउवाले भने, “अव जाली सर्टिफिकेट बनाउने मान्छेलाई आईजीपी बनाउनुपर्ने ? जाली काम गर्नेलाई कारवाही गर्ने आईजीपीले आफैँ जाली काम गरे के हुन्छ ?”