एजेन्सी । रसियामा जारी विश्वकप फुटबलअन्तर्गत समुह ‘ए’ को खेलमा उरुग्वेले सुरुवाती अग्रता लिएको छ । उरुग्वेका लागि स्वारेजले गोल गर्दै अग्रता दिलाएका हुन् ।
खेलको २३औं मिनेटमा लुइस स्वारेजले गोल गरेका हुन् । २ पटक विश्वकपको उपाधि उचालेको उरुग्वे जारी विश्वकपकै कमजोर राष्ट्रको रुपमा रहेको साउदी अरबबीच प्रतिस्पर्धा भईरहेको छ ।
समूह चरणको पहिलो खेलमा उरुग्वेले इजिप्टलाई १–० गोलअन्तरले पराजित गरेको थियो । यता, साउदी अरबभने आयोजक रसियासँग ५–० गोलको फराकिलो अन्तरले पराजित भएको थियो ।
आजको खेलमा साउदी अरब पराजित भएमा विश्वकपबाटै बाहिरिने छन् भने आयोजक रसिया र उरुग्वे नकआउट चरणमा पुग्ने छन् । रसियाले यसअघि भएको दुई खेलमा नै जित हात पार्दै ६ अंक बटुलेको छ । रसियाले मंगलबार राति इजिप्टलाई ३–१ गोलअन्तरले पराजित गरेको थियो । उरुग्वेले साउदी अरबलाई पराजित गरेमा उसको पनि ६ अंक हुने छ भने उरुग्वे र रसिया एक खेल खेल्नु अघि नै प्रिक्वाटरफाइनलमा पुग्ने छन् ।