एजेन्सी । जारी विश्वकप फुटबलको एक स्टार अनुहार हो क्रिष्टियानो रोनाल्डो । पोर्चुगलका कप्तान रोनाल्डोले आफ्नो पहिलो खेलमा नै उत्कृष्ट प्रदर्शन गर्दै ह्याट्रिक गोल गरे ।
रसियामा जारी विश्वकप फुटबलमा समूह बी मा रहेको पोर्चुगलले आफ्नो पहिलो खेलमा स्पेनसँग ३–३ गोलको बराबरी खेल्दा रोनाल्डोले तीनै गोल गरेका थिए । अन्तिम समयमा फ्रि किकबाट उत्कृष्ट गोल गर्दै पोर्चुगललाई हारबाट जोगाएका रोनाल्डोलाई अबको खेलमा रोक्न अन्य टिमलाई धौ–धौ पर्न सक्ने अन्तर्राष्ट्रिय मिडियाले उल्लेख गरेका छन् ।
निकै लयमा देखिएका रोनाल्डो स्पेनविरुद्ध गोलगरेसँगै आफ्नो नाममा कीर्तिमानी कायम गर्न समेत भ्याए । उनले खेलेको ४ वटै विश्वकपमा गोल गर्दै आफ्नो क्षमता देखाएका छन् ।
ठूला ८ प्रतियोगितामा लगातार गोल गर्ने एक्ला खेलाडी
क्रिस्ष्टियानो रोनाल्डो त्यस्ता खेलाडी हुन् जसले ८ ठूला प्रतियोगितामा लगातार गोल गर्दै विश्व कीर्तिमान बनाएका छन् । उनले स्पेनविरुद्धको खेलमा गोलगरेसँगै यस्तो कीर्तिमान बनाएका हुन् ।
रोनाल्डोले विश्वकप फुटबलमा सन् २००६, २०१०, २०१४ र २०१८ मा लगातार गोल गरे । त्यस्तै मिनी विश्वकपको रुपमा परिचित युरोकपको लगातार ४ संस्करणसम्म गोल गरेका छन् । सन् २००४, २००८, २०१२ र २०१६ को युरोकपमा रोनाल्डोले लगातार गोल गरेका थिए ।
सन् २००३ देखि राष्ट्रिय टोलिमा आवद्ध भएका रोनाल्डोले सन् २००६ मा जर्मनीमा भएको विश्वकप खेलेका थिए । उनले आफ्नो डेब्यु विश्वकपमा नै १ गोल गरेका थिए । इंग्ल्याण्ड र इरानविरुद्ध दुई गोल गरेका रोनाल्डोले सन् २०१० मा भएको विश्वकप फुटबलमा उत्तर कोरिया विरुद्ध पोर्चुगलले ७–० गोलअन्तरले पराजित उनले पनि एक गोल गरेका थिए ।
सन् २०१४ को विश्वकप पोर्चुगलको लागि बिर्सन लायक बन्दा रोनाल्डो पनि असफल भएका थिए । आफ्नै कप्तानीमा पोर्चुगल समूह चरण पनि पार गर्न नसक्दा रोनाल्डोलाई त्यसबेला निकै पिर परेको थियो । यद्यपी समूह चरणको अन्तिम खेलमा पोर्चुलले घानालाई २–१ गोलअन्तरले पराजित गर्दा रोनाल्डोले पनि एक गोल गरेका थिए ।
यसअघि खेलेका ३ विश्वकपबाट ३ गोल मात्रै गर्न सफल भएका रोनाल्डो यो विश्वकपमा भने निकै लयमा देखिएको छ । आफ्नो पहिलो खेलमा नै ३ गोल गरिसकेका छन् ।
रोकिँदैनन् रोनाल्डो
बलियो प्रतिद्वन्द्वी स्पेनविरुद्ध उत्कृष्ट प्रदर्शन गर्दै ह्याट्रिक गोल गरेका रोनाल्डोले अबका खेलमा कति गोल गर्लान् ? त्यसो त, समूह चरणमा अब पोर्चुगलले कमजोर टिमसँग खेल्दैछ ।
पोर्चुगलले समूह चरणमा अब मोरक्को र इरानसँग प्रतिस्पर्धा गर्न बाँकी छ । पहिलो खेलमा नै ३ गोल गरेका रोनाल्डोले यी दुई खेलमा पनि उत्कृष्ट प्रदर्शन गर्ने सबैको अनुमान छ । रोनाल्डो रसियामा जारी विश्वकप फुटबलको गोल्डेन बुटको दाबेदार पनि हुन् ।