बीबीसी । अमेरिकी राष्ट्रपति डोनाल्ड ट्रम्पले ‘स्पेस फोर्स’ अर्थात अन्तरिक्ष सेनालाई छैठौँ शाखा बनाउन चाहेको उल्लेख गरेका छन् । सोमबार नै उनले देशका सुरक्षाका निम्ति अन्तरिक्षमा समेत अमेरिकाको बलियो र प्रभावकारी उपस्थिति रहोस् भन्ने उद्देश्यले सो योजना सार्वजानिक गरेको बताएका हुन् ।
उनका अनुसार यो अलगै किसिमको सेना हुनेछ जसले केबल देशको सुरक्षामा मात्र नभएर रोजगारी र अर्थव्यवस्थामा पनि ठूलो योगदान पुर्याउनेछ । यसका साथै उनले अबपनि प्रविधिको विषयमा रुस र चीन जस्ता देशहरुलाई अमेरिका भन्दा अगाडि रहन दिनु उचित नहुने बताएका हुन् । त्यसैगरी ट्रम्पले अब आउँदो भविष्यमा अमेरिका फेरि चन्द्रमा पुग्ने वचन दिएका छन् र मंगल ग्रहमा पठाउन समेत चाँडै तयारी गर्ने बताएका हुन् ।
सोमबार ट्रम्पले राष्ट्रिय स्पेस काउन्सिलका साथ हुन लागेको बैठकपूर्वको पत्रकार सम्मेलनमा बोल्दै रक्षा विभाग र पेन्टागनलाई आदेश दिएका हुन् । ट्रम्पले आफ्नो बयानमा तीव्र रुपमा अघि बढिरहेको स्पेस इन्डस्ट्रीसँग कदममा कदम मिलाएर काम गर्ने संकेत दिएका छन् । त्यसैगरी उनले देशका धनी नागरिकहरुलाई देशको सम्पतिको प्रयोग गरि अन्तरिक्षमा रकेट लन्च गर्ने अनुमति पनि दिने बताएका हुन् ।
तरपनि यसले कसरी काम गर्ने र नयाँ स्पेस फोर्सको रुप कस्तो हुनेछ भन्नेमा चाहिँ अझै स्पष्ट जानकारी प्राप्त भएको छैन ।
यसरी सेनाको नयाँ शाखा बनाउन पहिले अमेरिकी कांग्रेसले यस सम्बन्धी कानून पारित गरि ट्रम्पको यस फैसलालाई वैध तुल्याउनु पर्ने हुन्छ । यसरी भाषण दिँदै गर्दा ट्रम्प निकै हर्षित देखिएका थिए तरपनि ट्रम्पले अचानक स्पेस आर्मीको कुरा गर्दा पहिले त सबै अचम्ममा परेका हुन् । यो भन्दा पहिले अमेरिकाका पूर्व रक्षा मन्त्री डोनाल्ड रम्सफील्डले पनि सन् २००० मा एउटा अलग स्पेस फोर्स तयार गर्ने प्रस्ताव राखेका थिए तर यसको कुनै परिणाम निस्किएन ।
