विदेश

सिंगापुर बैठकको परिणामसँग कत्तिको सन्तुष्ट छन् दक्षिण कोरिया, चीन र जापान ?

सिंगापुर बैठकको परिणामसँग कत्तिको सन्तुष्ट छन् दक्षिण कोरिया, चीन र जापान ?

एजेन्सी । राष्ट्रपति ट्रम्प र किमबीचको ऐतिहासिक भेटवार्ता सफलतापूर्वक सम्पन्न भएपनि यसप्रति अन्तर्राष्ट्रिय समुदायको प्रतिक्रिया भन्ने भिन्दाभिन्दै रहेको सीएनएनले जनाएको छ । बैठकपछि अहिलेसम्मकै लामो पत्रकार सम्मेलन गरि ट्रम्पले हस्ताक्षर गरिएको सम्झौतामा अमेरिकाले उत्तर कोरियाको सुरक्षा सुनिश्चित गरेवापद् उनीहरुले पूर्णरुपमा निशस्त्रीकरण गर्ने प्रतिवद्धता जनाएको बताएका हुन् । तरपनि यस विषयमा सम्बन्धित राष्ट्र चीन, दक्षिण कोरिया र जापानले भने निकै फरक धारणा व्यक्त गरेका छन् । 

पत्रकार सम्मेलनकै क्रममा ट्रम्पले उत्तर कोरियामाथिको प्रतिबन्ध अझै जारी रहने जानकारी पनि दिएका हुन् जसप्रति चीनले असहमति जनाएको छ । उत्तर कोरियाले पूर्ण रुपमा निशस्त्रीकरण गर्ने प्रतिबद्धता जनाइसकेकाले संयुक्त राष्ट्र संघ र अमेरिकाले पनि प्रतिबन्धको मामिलामा केही राहत प्रदान गर्नुपर्ने चिनियाँ विदेश मन्त्रीका प्रवक्ता गेङ स्वङले बताए । चीनले यसअघि पनि प्रतिबन्ध उत्तर कोरियाको मुद्दा सुल्झाउने उचित उपाय नभएकोमा जोड दिँदै आएको छ । त्यसकारण संयुक्त राष्ट्रले उत्तर कोरियाको वार्ता र सम्झौतामार्फत समस्या समाधान गर्ने शान्तिपूर्ण कदमको समर्थन गर्नुपर्ने उनले बताएका हुन् ।
अर्कोतर्फ ट्रम्पले दक्षिण कोरियासँगको सैन्य अभ्यास अमेरिकाका लागि धेरै महङ्गो र उत्तर कोरियाका लागि पनि आपत्तिजनक विषय भएकाले अमेरिकी सेनालाई कोरियाबाट फिर्ता बोलाउने बारे सोचिरहेको बताएका हुन् । यसरी बैठकको पूरा श्रेय पाइरहेको दक्षिण

कोरिया यस सम्मेलनको सफलताबाट सबैभन्दा धेरै खुसी भएपनि ट्रम्पको यस भनाइप्रति भने उनीहरुले असन्तुष्टि जनाएका छन् । त्यसकारण अहिले दक्षिणको राष्ट्रपति कार्यालयले ट्रम्पको भनाइको वास्तविक मतलब र उद्देश्यबारे स्पष्ट हुन चाहेको उल्लेख गरेको छ ।
पत्रकार सम्मेलनकै क्रममा ट्रम्पले आफ्ना नजिकी मित्र जापानका प्रधानमन्त्री सिन्जो आबेले लगातार उठाउँदै आएको जापानीहरुको अपहरणको मुद्दालाई पनि किमसम्म पुर्याएको बताएका हुन् । यसैबारे प्रधानमन्त्री आबेले खुसी व्यक्त गर्दै ट्रम्पलाई धन्यवाद दिएका छन् भने सम्मेलनबारे ट्रम्पबाटै पूरा जानकारी प्राप्त गर्न इच्छुक रहेको बताएका छन् । 

उता ट्रम्पले भने आफ्नो अडान विपरित कुरा गर्दै किमप्रति पूरा विश्वास रहेको उल्लेख गरि सबैलाई आश्चर्यमा पारेका हुन् । कुनैसमय उत्तर कोरियामाथि अत्यन्तै कडा स्वभाव प्रकट गरेका ट्रम्प अहिले तिनै किमप्रति अति नम्र हुँदै निरन्तर उनको समर्थनमा बोलिरहेको बताइएको छ । किमले साँच्चिकै आफ्ना नागरिकहरुका लागि केही उपलब्धीमूलक कार्य गर्न चाहेको भन्दै उनलाई ह्वाइटहाउस निम्ता गर्नमा पनि कुनै समस्या नभएको ट्रम्पको भनाइ छ । ट्रम्पका अनुसार उत्तर कोरियासँग समृद्धि र विकासको धेरै सम्भावना भएकाले अमेरिकाले पनि भविष्यमा सक्दो सहयोग गर्नेछ । यसका साथै उनले आफ्ना आलोचकहरुलाई आजको सम्मेलनमा सहभागी भएर आफूले केही नगुमाएको सन्देश समेत दिएका हुन् ।
 

तपाईंको मत