एजेन्सी । मेक्सिकोका राष्ट्रपति एन्रिके पेना नेइटो र ट्रम्पबीच पुनः सीमा क्षेत्रकै विषयमा भनाभन परेको छ । मेक्सिको र अमेरिकाबीच रहेको खुला सीमा मार्फत अवैध रुपमा आप्रवासीहरु भित्रिएर देशमा अपराध बढाएको भन्दै यसअघि राष्ट्रपति ट्रम्पले सीमानामा ठूलो पर्खाल निर्माण गर्ने घोषणा गरेका हुन् । तर ट्रम्पको यस्तो निर्णयप्रति मेक्सिको मात्र नभएर अमेरिकी सांसदले समेत असन्तुष्टि जनाइरहेका छन् । 
यसैप्रति फेरि ट्रम्पको कडा आलोचना गर्दै राष्ट्रपति नेइटोले मंगलबार चेतावनीपूर्ण ट्वीट गरेका छन्, ‘मेक्सिकोले अमेरिकी पर्खालका लागि कुनैपनि खर्च गर्ने छैन, न अहिले न भविष्यमा ।’  वास्तवमा त्यसै दिन ट्रम्पले मेक्सिकोलाई आप्रवासीहरुको प्रवेशमाथि रोक लगाउन कुनै सहयोग नगरेको टिप्पणी गरेका थिए । उनको यसै भनाइपछि नेइटोले पनि स्पष्ट रुपमा उनीसँग असहमति जनाउँदै सो ट्वीट गरेको अन्तराष्ट्रिय संचार माध्यमले जनाएका छन् । 
यही विषयमा उत्पन्न भएको विवादका कारण यसअघि नेइटोले यो वर्षको ह्वाइट हाउस भ्रमण समेत रद्द गराएका थिए । तर ट्रम्पले भने पर्खालको खर्च मेक्सिकोले नै उठाउने दाबी गरिरहेका छन् । मेक्सिकोले अमेरिका भित्रिएर पैसा कमाउने तर यस प्रकारका गतिविधि हटाउन भने कुनै काम अघि नबढाउने ट्रम्पको आरोप छ । तरपनि मेक्सिकोप्रति ट्रम्पको यस्तो व्यवहारले दुई देशबीचको व्यापारिक योजनाहरुमा गम्भीर असर पर्न सक्नेमा अमेरिकी विज्ञहरुले भने चिन्ता व्यक्त गर्दै आएका छन् ।