एजेन्सी । १२ महिना प्रतिबन्धमा परेका अष्ट्रेलियाका पूर्वकप्तान स्टेभन स्मिथले ग्लोबल टि–ट्वान्टी क्यानाडा लिग क्रिकेट प्रतियोगिता खेल्ने भएका छन् । आईसीसीले उल्लेख गरेको समाचारमा क्यानाडा लिगमा स्मिथ मार्की खेलाडी चुनिएको उल्लेख गर्दै उनले खेल्ने उल्लेख छ ।
मार्चमा दक्षिण अफ्रिका विरुद्ध भएको टेष्ट खेलमा बल टेम्परिङ गरेको आरोपमा कप्तान स्टेभन स्मिथसँगै उपकप्तानलाई पनि अष्ट्रेलियन क्रिकेट बोर्डले १२ महिनाको लागि प्रतिबन्ध लगाएको थियो । तर विदेशी राष्ट्रको घरेलु प्रतियोगितामा भने खेल्न पाउने भएको भन्दै उनी क्यानाडाको घरेलु लिगमा मार्की खेलाडी चुनिएको आईसीसीले उल्लेख गरेको छ । यद्यपी इन्डियन प्रिमियर लिग (आईपीएल) को राजस्थान रोयल्स क्लबबाट भने स्मिथले राजीनामा दिएका थिए ।
क्यानाडाको घरेलु लिगमा स्मिथसहित १० जना खेलाडी मार्की खेलाडी चुनिएका हुन् । चुनिएका अन्य मार्की खेलाडीमा अष्ट्रेलियाकै क्रिस लिन, पाकिस्तानका शाहिद अफ्रिदी, श्रीलंकाका लासिथ मालिंगा र दक्षिण अफ्रिकाका डेभिड मिल्लर रहेका छन् ।
मार्की खेलाडीको रुपमा छनोट हुने अन्य खेलाडीमा वेष्ट इन्डिजकै ५ जना खेलाडी रहेका छन् । क्रिस गेल, ड्वाएन ब्राभो, सुनिल नारिने, आन्ड्रे रुसेल र ड्यारेन सामी रहेका छन् ।
प्रतियोगिता २५ जुनदेखि १५ जुलाईसम्म मेपल लिएफ क्रिकेट क्लबमा हुने छ । प्रतियोगितामा ६ टिमले २२ खेल खेल्ने छन् । खेलाडीको ड्राफ मे ३० मा सार्वजनिक गर्नेे आयोजकले बताएको आईसीसीले उल्लेख गरेको छ ।