एजेन्सी । दक्षिण अफ्रिकाका ब्याट्सम्यान एबी डी भिलियर्सले अन्तर्राष्ट्रिय क्रिकेटबाट सन्यास लिएका छन् । भिलियर्सले बुधबार सबैखाले फर्म्याटको क्रिकेटबाट सन्यास घोषणा गरेका हुन् ।
दक्षिण अफ्रिकामा महान क्रिकेटरमा स्थापित ३४ वर्षीय डी भिलियर्सले १४ वर्षे अन्तर्राष्ट्रिय क्रिकेटबाट सन्यास लिएका हुन् । डी भिलियर्सले आफू थकित भएका कारण यो समय अन्तर्राष्ट्रिय क्रिकेटबाट सन्यास लिने उपयुक्त समय रहेको बताएका छन् ।
सन्यासबारे डी भिलियर्सले भनेका छन, “सबै खाले फर्म्याटको क्रिकेटबाट सन्यास लिने निर्णय गरेको छु । मेरो लागि यो कठिन निर्णय हो ।” यस्तै उनले आफूले नयाँ खेलाडीलाई मौका दिन यो समयमा सन्यास लिएको बताएका छन् ।
दक्षिण अफ्रिकाका पूर्व कप्तानसमेत रहेका डी भिलियर्सले ११४ टेष्ट, २२८ एक दिवसीय र ७८ टि – ट्वान्टी अन्तर्राष्ट्रिय क्रिकेट खेलेका छन् । डी भिलियर्सले टेष्टमा ८ हजार ७६५ रन जोड्दा २२ शतक र ४६ अर्धशतक बनाएका छन् । यस्तै उनले एक दिवसीयमा २५ शतक र ५३ अर्धशतकसहित ९ हजार ५७७ रन बनाउँदा टि – ट्वान्टीमा १ हजार ६७२ रन बनाएका थिए ।
डी भिलियर्सले अन्तर्राष्ट्रिय क्रिकेटमा केहि कीर्तिमानी प्रदर्शन समेत गरेका छन् । विश्व बरियतामा दोस्रो स्थानमा रहेका डी भिलियर्सले एकदिवसीय क्रिकेटमा सर्वाधिक चाँडो अर्धशतक र शतक बनाउने कीर्तिमान बनाएका छन् । डी भिलियर्सले १६ बलमा अर्धशतक र ३१ बलमा शतक बनाउँदै कीर्तिमान कायम गरेका हुन् ।

डी भिलियर्सले यो सिजनको इन्डियन प्रिमियर लिग (आईपीएल) रोयल च्यालेन्जर्स बैंगलोरबाट खेलेका थिए  । तर, बैंगलोर यो सिजन प्ले अफमा पुग्न असफल भएको थियो ।